Kapin 20 nasikop, P2M shabu nasakmit

CEBU, Philippines - Kapin P2 milyones nga shabu ang nasakmit sa manglahing mga operasyon kontra ilegal nga drugas ug armas nga gihimo sa kapolisan ug Philippine Drug Enforcement Agency-7.

Sa Dakbayan sa Danao nasikop sa grupo ni Sr. Insp. Gerald Pelare ang 14 ka mga gidudahang drug pushers apil ang tulo ka mga babaye ingon man ang 17- anyos ug pagkasakmit sa mokabat sa P2.2 milyones nga kantidad nga shabu ug usa ka .9mm nga pistola gikan sa maong menor de edad. Ang operasyon gihimo diha sa Brgy. Looc ug Poblacion sa maong dakbayan.

Samtang sa Lapu-Lapu City gironda usab ang Barangay Mactan ug nadakpan ang usa ka gidudahang drug pusher samtang laing usa ang nakaikyas apan nakakuha ang kapolisan og pinaketeng shabu ug armas.

Nadakpan usab sa kapolisan sa Lungsod sa Cordova ang pusher sa Barangay Ibabao, samtang sa Barangay Tipolo, Dakbayan sa Mandaue nadakpan ang laing drug pusher nga nakuhaan usab og pinaketeng shabu.

Samtang sa operasyon sa PDEA-7 diha sa  Sitio Sindulan, Brgy. Mabolo nga niresulta sa pagkasikop nilang Cecilia Escoton, 54, ug sa iyang kakunsabo nga si Agustin Alonzo, 49. Nakuha gikan sa duha ang 14 ka mga pakete sa gidudahang shabu diin mokantidad na og P51,300.

Samtang sa barangay Ermita, nadakpan ang 18 anyos nga babaye nga si Karen Mae Baclayon nga usa ka high value target sa maong lugar nga nakuhaan usab og pinaketeng drugas.

Sa Toledo City nasikop ang tulo ka mga drug pushers sa Sitio San Juan, Barangay Poblacion ug nakuhaan og 18 ka paketeng drugas.

Sa operasyon usab sa Talisay City Police Station diha sa Sitio Baybay, Barangay Dumlog nakaikyas ang target nila nga suspek apan adunay nakuhang mga pinaketeng shabu ug usa ang nadakpan diha sa balay sa ilang target. Romeo Limpangog, Camille Pateres, Rowena Capistrano, Gabriel Bonjoc ug Jemuel Man-on (BANAT NEWS)