Duha patay, tulo angol sa aksidente sa Bogo, Naga

CEBU, Philippines - Duha ang patay samtang tulo ang naangol sa managlahing aksidente sa dalan sa Siyudad sa Naga ug Bogo sa niaging adlaw.

Sa Siyudad sa Bogo, patay ang 62-anyos nga babaye nga giilang si Feladelfa Ruegas, molupyo sa Sitio Manoong, Don Pedro, kinsa giingong nilabang sa karsada dihang nabanggaan sa motor.

Gidala pa sa tambalanan ang biktima gumikan sa bun-og ug samad sa ulo apan human sa usa ka oras gideklarar kini nga patay na.

Gibuhian sa kapolisan ang drayber sa motor human nipirma ang bana sa biktima nga dili na mosang-at og kaso.

Samtang sa Dakbayan sa Naga, patay ang 15-anyos nga biktima nga si Dominic Moga, taga Cogon Pardo, Dakbayan sa Sugbo human nabangga ang gisakyang motor sa awto sa kurbadang bahin sa national highway sa Barangay Pangdan.

Sa maong insidente duha ang naangol nga giila nga sila si Agapito Alimento, 28, ug William Paras, 7-anyos, kinsa kasamtangang nagpaayo sa tambalan.

Sa laing bahin, gitug-an sa pangulo sa City Disaster Risk Reduction and Management Office (CDRRMO) sa Talisay nga dili gyud angayan pa biseklitahan ang karsada sa Manipis.

Matud ni Alvin Santillana nga delikado ang kinabuhi sa matag biker tungod sa karsada nga wala pa gyud nahuman og butang og mga gutter nga makatabang sa pagpugong sa mga sakyanan nga matagak sa lawom nga pangpang.

Niadtong Domingo sa buntag, usa ka Cris Ababa, 37, taga Dakbayan sa Lapu-Lapu ang natagak patay sa pangpang sa Campo 6, Barangay Manipis. Jemmuel V. Man-on, CNU Intern; Rowena D. Capistrano ug Gabriel C. Bonjoc (BANAT NEWS)