Mga positibo sa drugas ipataktak

CEBU, Philippines - Ipataktak ni Mayor Tomas Osmeña ang mga kaswal nga kawani sa City Hall ug sa kabarangayan nga nagpositibo sa kinalit nga drug test nga gipahigayon sa Cebu City Office for Substance Abuse Prevention bisan wala pa nakompirmar ang resulta.

Matud ni Osmeña nga subay sa iyang palisiya, dapat ang kawani mismo ang magpamatuod nga sila limpyo ug dili kinahanglan pa nga mangita og ebidensya para mapamatud-an nga sila inosente.

Matud ni Dr. Alice Utlang, hepe sa COSAP, nga modagan pa og labing dugay usa ka buwan una makompirmar ang 130 ka kawani nga nagpositibo sa drug test.

Gikompirmar sab ni Utlang nga sa 80 ka barangay sa siyudad, humana ang 76 ka barangay sa kinalit nga drug test.

Apan ang Barangay Banilad, Bonbon, Talamban, Kasambagan, Poblacion Pardo ug Kinasang-an pa ang hingpit na nga nakahuman sa drug test apil na niini ang mga opisyal kinsa wala’y nagpositibo.

Matud ni Utlang nga prayoridad sa mayor ang mga barangay loaders, tanods ug drivers apan dili pasabot nga dili na mopailawom sa drug test ang ubang opisyal.

Ang kampanya alang sa drug-free workplace magpadayon bisan pa man og pulihan na si Utlang ni Garry Lao, konsehal sa Barangay Tejero, karong Hunyo 1. Gerlie N. Macalua (BANAT NEWS)