Pagguba sa mga karsada nga maayo pa gisaway

CEBU, Philippines - Daghan ang nisaway sa gihimo sa Department of Public Works and Highways (DPWH) nga pagguba sa mga karsada sa Dakbayan sa Sugbo nga nindot pa kaayo aron lang aspaltuhon pag-usab.

Gihulagway sa katawhan nga usa ka pagwaldas sa kwarta sa kagamhanan ang gihimo sa kadagkuan sa DPWH tungod kay nikuha ra gyud sila og contractor aron aspaltuhon pagbalik ang mga karsada nga hamis pa kaayo.

Apil sa mga karsada sa dakbayan nga gipangguba lang gyud pagtuyo bisan og nindot pa nagpalibot sa Fuente Osmeña Rotunda. Daghan ang gianugnan sa salapi nga gastuhon sa kagamhanan alang sa maong proyekto.

Si Konsehal Jerry Guardo, ang deputy mayor for infrastructure matters, niingon nga padad-an niya’g suwat ang kadagkuan sa DPWH aron pangutan-on ngano nga ingon niini ang ilang gihimo sa nindot pa kaayong karsada.

Matud ni Guardo nga dunay daghang karsada sa dakbayan nga nanginahanglan na nga ayuhon apan wala hinoon kini hatagi og unang pagtagad sa DPWH.

Ang kadagkuan sa DPWH dili hinoon makagasto sa pundo gikan sa nasudnong kagamhanan sa mga karsada nga giisip nga “city roads” kay kadto ra nga mga national roads maoy ilang atimanon.

Ubos sa kategoriya sa DPWH, kadto ra nga karsada nga labing minus 10 metros ang gilapdon maoy isipon nga national road ug mahimong gastuhan og pundo gikan sa nasudnong kagamhanan.

Si Mayor Tomas Osmeña niingon nga daghang karsada sa dakbayan nga angayan unta nga atimanon kanunay sa DPWH kay kanunay kini nga agian sa daghang mga sakyanan.

Kadtong wala makauyon sa pagpangguba sa mga nindot pa nga karsada nagduda nga gipugos lang gyud sa DPWH ang pagpangita og mga proyekto aron nga makabahin sila og komisyon sa minilyon nga kontrata pagpaaspalto sa karsada. (BANAT NEWS)