Garganera suporta sa BRT

CEBU, Philippines - Suportado sa pangulo sa committee on environment sa konseho sa Siyudad sa Sugbo, Konsehal Joel Garganera, ang gitinguha ni Mayor Tomas Osmeña nga Bus Rapid Transit (BRT) diin kapin sa dos mil ka punoan sa kahoy ang maapektuhan.

Gihulagway ni Garganera nga ang pagluka sa mga kahoy maoy sakto nga pamaagi aron maprotehian ang kinaiyahan bisan kinahanglan nga mogasto og dakong kantidad.

Ang Parks and Playground Commission duna nay giila nga lugar diin balhinan sa mga kahoy.

Sugyot ni Garganera nga ang siyudad mogahin og lima ngadto sa 10 ka ektarya nga luna sa South Road Properties aron himoon nga park ug didto mahimong ipamutang ang mga kahoy.

Kini gumikan kay usa sa gikinahanglan sa siyudad karon mao ang lapad nga luna nga kabalhinan sa mga kahoy.

Gawas sa SRP, usab sa tinguha sa konsehal mao ang Children’s Park sa Barangay Pasil.

Giingong ang maong lugar wala na maatiman ug wala na magamit sa mga bata ug baho na sab gihimong parkingan sa mga sakyanan nga kargahan sa mga isda.

Ang Community Environment and Natural Resources Office (CENRO) nibutyag nga duna sila’y “Adopt Tree” program diin daghan na ang nipadayag og interest nga mo-adopt og mga fruit bearing trees.

Wala’y pagsupak ang konsehal niini apan nanghinaut nga ang pag-adopt sa mga kahoy naa lang sulod sa Siyudad sa Sugbo. (BANAT NEWS)