Ambulansiya ipagamit gyud panahon sa emerhensiya
Nahimong sponsor sa resolusyon sa pagpatawag kang Catan si First District Board Member Raul Bacaltos kun asa nahisakop ang Minglanilla. Apan kay wala ang bokal kagahapon sa sesyon, si Bokal Sun Shimura maoy mi co-sponsor sa resolusyon niini. Philstar.com/File
CEBU, Philippines - Gipatawag sa Hunta Probinsiyal ang pangulo sa Provincial Health Office (PHO) Dr. Rene Catan sa sunod nga regular session niini karong Lunes, Hunyo 5, 2017 aron sa paghatag og katin-awan kalabot sa isyu nga naglambigit sa ambulansya sa Minglanilla District Hospital nga wala gipagamit pagluwas sa usa ka lalaki nga naligsan sa maong lungsod niadtong miaging semana.
Nahimong sponsor sa resolusyon sa pagpatawag kang Catan si First District Board Member Raul Bacaltos kun asa nahisakop ang Minglanilla. Apan kay wala ang bokal kagahapon sa sesyon, si Bokal Sun Shimura maoy mi co-sponsor sa resolusyon niini.
Si Shimura nagkanayon nga buot nilang mahatagan og katin-awan ang proseso sa mga provincial ug district hospitals partikular na sa paggamit sa ambulansiya.
Kahinumduman nga napuno og pagsaway ang Kapitolyo human sa maong hitabo gumikan sa giingong palisiya nga nagdili sa pagpagamit sa ambulansiya sa rescue operations kay alang ra kini sa paghatod og pasyente. Gani gihimakak kini sa gobernador ug mitataw nga wala’y palisiya ang Kapitolyo nga magbalibad sa mga nanginahanglan.
Subay niini si Catan gikatakdang makigtigom sa mga hepe sa mga tambalanan sa probinsiya kabahin sa paggamit sa ambulansiya. Iyang gipasabot nga ang gisunod nga palisiya sa Minglanilla District Hospital mao ang revenue code diin kun adunay ikarga nga pasyente, sutaon kun kinsa ang mobayad. Apan sa panahon sa emerhensiya sama sa nahitabo, giingong wala’y palisiya bahin niini.
Niining ulahi lang, nakadawat og kamanduan si Catan gikan sa gobernador diin ang ambulansiya ipagamit gyud panahon sa emerhensiya. Nunot niini gipaubos na sa preventive suspension ang chief of hospital sa nahisgutang tambalanan nga si Dr. Bella Villaganas.
Matud ni Catan nga nakasumiter na sa iyang eksplenasyon sa grievance committee sa PHO si Villaganas apan wala pa niya kini mabasa.
Giingong kun mapamatud-an nga adunay nahimong kalapasan ang maong doktor, ang reklamo batok kaniya ipasaka ngadto sa Committee on Discipline and Investigation sa Kapitolyo.
Le Phyllis F. Antojado ug Brenda D. Batuto (BANAT NEWS)
- Latest
