Holiday sa Toledo gipasar sa Kamara

CEBU, Philippines - Giaprobahan na sa Ubos Balay-Balauranan o Kamara Baha ang pagdeklarar sa Enero 6 matag tuig nga special non-working holiday sa Dakbayan sa Toledo.

Subling gisang-at ni Deputy Speaker for the Visayas ug Kongresista Gwendolyn Garcia sa ikatulong distrito sa Probinsiya sa Sugbo ang House Bill No. 1637 niadtong Hulyo Hulyo 18, 2016 ug giilisan kini sa HB No. 5214 dihang gipasar ug giduso ngadto sa Senado.

Isip tubag sa hangyo sa konseho sa siyudad pinaagi sa resolusyon nga gipangamahanan ni kanhi konsehal Ricardo “Kuya Nick” Pepito, si Garcia unang nisang-at sa HB No. 4984 niadtong 2014 apan wala kini napasar sa niaging Kongreso.

Niadtong Hunyo 19, 1960 nahimong siyudad ang Toledo ubos sa Republic Act No. 2688 nga gipangamahanan ni kanhi kongresista Manuel A. Zosa.

Sukad niadto ang katawhan sa Dakbayan sa Toledo nagsaulog sa ilang charter day matag Enero 6.

Hinulawan ang unang pangan sa lungsod tungod sa Hinulawan River apan giusab kini og Toledo gikan sa usa ka dapit sa Espanya.

Paspas ang paglambo sa Toledo gikan sa usa ka lungsod hangtud nga nahimong siyudad dihang niabli ang Atlas Consolidated Mining and Development Corporation (ACMDC) sa Barrio Don Andres Soriano niadtong 1950s. (BANAT NEWS)