9 kawani sa DPS positibo sa drugas

CEBU, Philippines - Siyam ka kawani sa Cebu City Hall nga nadestino sa Department of Public Services (DPS) ang napositibo sa kinalit nga drug test ug posible sila nga mataktak sa ilang mga trabaho.

Si Dr. Alice Utlang nga maoy hepe sa City Office for Substance Abuse Prevention (COSAP) nibutyag nga ang siyam nga napositibo sa paggamit og shabu kabahin sa 273 ka kawani sa DPS nga gi-drug test niadtong Biyernes.

Wala hinoon motug-an si Utlang kun pulos ba kaswal nga kawani ang maong mga napositibo sa paggamit og shabu. Ang lagda mao nga kun ang pasiunang drug test results mapositibo gihapon sa pagahimoon nga confirmatory test, sila taktakon gyud sa serbisyo.

Ang mga kawani nga regular ug covered sa balaud sa Civil Service Commission (CSC), imbestigahon sa City Legal Office ug hatagan og higayon nga panalipdan ang ilang kaugalingon gikan sa pagkataktak sa trabaho.

Matud ni Utlang nga si Mayor Tomas Osmeña istrikto gyud kaayo kabahin sa mga kawani sa City Hall nga mamatud-ang mogamit og gidili nga matang sa drugas. Gibutyag sab ni Utlang nga adunay usa ka kawani sa DPS nga niikyas ug wala magpa-drug test.

Ang mao nga kawani nagpatuo nga maglisud siya sa pagpangihi ug wala gyud makahatag og sampol sa iyang ihi hangtod nga wala na siya igkita niadtong Biyernes.

Matud ni Utlang nga kadtong mga kawani nga moikyas sa drug test maisip na nga sila may gikahadlokan ug kun kaswal sila nga kawani, basehanan na kini nga sila taktakon sa serbisyo.

Ang pag-drug test sa mga kawani sa City Hall ug sa kabarangayan magpadayon, bisan pa og dili na si Utlang maoy hepe sa COSAP.  -/GMR (BANAT NEWS)