Cebu City-Compostela road gitinguha

CEBU, Philippines - Gitinguha sa Kapitolyo nga mapalambo ang direktang agianan gikan sa Dakbayan sa Sugbo paingon sa Lungsod sa Compostela aron dili na moagi ang mga motorista sa Dakbayan sa Mandaue, Lungsod sa Consolacion ug Liloan diin grabe ang kahuot sa trapiko.

Sa niaging tigum sa Provincial Development Council sa Sugbo, giawhag ni Bise Gobernador Agnes Magpale ang Department of Public Works and Highways nga ilakip sa P26 bilyones nga Metro Cebu Expressway road project ang Cebu City-Compostela nga karsada.

Si Magpale nitug-an nga nakaagi na siya sa maong karsada diin mas mubo ra ang iyang rota sa pagpauli sa Dakbayan sa Danao.

Matud ni Magpale nga karong tuiga ayuhon sa Kapitolyo ang bahin sa maong karsada sa habig sa Compostela.

Ang karsada moagi sa Barangay Mabini ug Paril sa Dakbayan sa Sugbo paingon sa Barangay Dapdap, Mulao, Basak, Cambayog sa Compostela lahos sa Barangay Canamucan sa maong lungsod.

Si DPWH-7 Regional Planning and Design chief, Engr. Nonato Paylado, nipasalig nga iyang ipaabot sa ilang ulohang buhatan ang sugyot ni Magpale.

Ang DPWH-7 nangadto sa endorsement sa PDC ngadto sa Central Visayas Regional Development Council labot sa P26 bilyones nga Metro Cebu Expressway nga dunay 74 kilometros nga gitas-on gikan sa Dakbayan sa Naga sa habagatan hangtud sa Dakbayan sa Danao sa amihanan.

Atol sa maong tigum sa PDC, nihimo og presentasyon ang Community Economic Development Corporation (CEDCO), pribadong engineering consultancy firm nga gikuha sa DPWH alang sa feasibility study sa Metro Cebu Expressway nga gilauman nga makasulbad sa huot sa trapiko sa 2050. (BANAT NEWS)