Patay human nisukol sa polis

CEBU, Philippines - Patay ang gikatahapang drug pusher nga napusilan sa mga sakop sa  Presinto 3 sa Mandaue City Police Office (MCPO) sa buy bust operation nga gihimo sa Palm Hills, Subdivision, Barangay Basak, Dakbayan sa Mandaue.

Ang napusilan mao si Gerose Perez, nagpuyo sa maong dapit ug maoy target sa buy-bust operation ug ang nadakpan nga naaktohan nga nagsuyop og shabu ang usa ka Romil Gabiana Leseña, 35, taga Sitio Canumay, Barangay Labogon sa mao gihapong dakbayan.

Si Chief Inspector Michael Angelo Beltran, hepe sa Presinto 3 maoy nangulo sa buy-bust operation human masuta nga positibo ang mga taho nga ilang nadawat labot sa ilegal nga kalihokan sa suspetsado sa maong dapit.

Tungod niini gilusad ang buy-bust operation apan nakabantay si Perez nga polis ang iyang katransaksyon maong dali kining midagan sa sulod sa ilang panimalay.

Gipusil unta niini ang poseur buyer apan wala makaboto ang armas  mao nga ang backup nga polis mipusil kang Perez nga niresulta sa iyang kamatayon.

Nakuha gikan sa iyang lawas ang lima ka paketeng gidudahang shabu, ug sa iyang tupad ang usa ka .38 rebolber.

Dali kining gidala sa tambalanan apan gideklarar kini sa mga doktor nga nag-atiman nga dead on arrival.

Sa gihimong pagsusi sa sulod sa panimalay ni Perez ilang nadakpan si Romel Gabiana Leceña nga nakuhaan og usa ka paketeng shabu, drug paraphernalia.   

Sa laing operasyon, mokabat  sa P590 mil nga shabu  ang nasakmit sa mga sakop sa Presinto 5 sa Lapu-Lapu City Police Office (LLCPO) atol sa   gihimo nilang buy-bust operation sa Sitio Mustang, Barangay Pusok sa maong dakbayan.

Si Police Chief Inspector Jaime Tolentino nga maoy hepe sa Presinto 5  sa LLCPO maoy nangulo sa buy- bust operation ug ilang nasakmit ang 50 gramos nga shabu gikan  kang Rommel Reyes Apa alyas Nano,33.

Matud pa ni Tolentino nga nakadawat sila og tawag sa telepono gikan sa nagpakabana nga lumolupyo nga nitug-an nga namaligya og shabu si Apa sa ilang dapit hinungdan sa gihimong operasyon ug nasakmit ang gibanabanang 50 gramos nga shabu.

Samtang 14 ka mga lalaki ang nasikop sa pagpangronda sa kapulisan sa Syudad sa Talisay diha sa Sitio San Miguel, Barangay Linao, dakbayan sa Talisay.

Sila si SPO4 Rolando Andales ug mga kaubanan ang nihimu og buy bust operation batok ni Franco Niño Badajos alyas Dino, 34, nga target nila sa operasyon.

Gawas pa ni Badajos giapil og dakop ang 13 ka mga tawong taga Minglanilla, City of Naga, Cebu City nga nidayo sa maong dapit ug gidudahang nanuyop.

Nakuha sa mga operatiba ang drugas gikan ni Badajos nga adunay timbang nga 5.68 grams nga aduna’y kantidad nga P19,312. -/EIM (BANAT NEWS)