Guwardiya, drayber ug mga trabahante imbestigahon

CEBU, Philippines - Iapil sa imbestigasyon ang mga construction worker sa construction company nga gitrabahoan sa babayeng accountant  nga gitulis ug gipusil patay sa duha ka wa pa mailhing mga tulisan lulan sa motorsiklo diha sa South Road Properties niadtong Sabado sa hapon.

Gitabangan sa mga sakop sa Homicide, Theft and Robbery Section, Investigation and Detective Management Branch (IDMB) ug Police Station 11 ang pag-imbestiga sa maong kaso.

Ang biktima nga kaslonon diay karong Disyembre nga si Jenely Aquino gikan pa nag-withdraw og kwarta sa bangko pangsweldo unta sa mga trabahante apan giatangan kini sa mismong gate sa construction site diin siya manweldo.

Ang hepe sa Mambaling Police Station nga si Police Senior Inspector Eduard Sanchez niingon sa Banat News nga gipangembargo nila ang mga cellphone sa security guards nga si Allan Quimmo Paubaya ug sa driver sa biktima nga si Delboy Lachia Arcenio aron ipaubos kini sa forensic investigation aron masuta kung aduna ba sila’y kalambigitan sa maong krimen.

Ila pong ikahinabi ang mga construction worker sa maong site ilabi na kadtong nang-absent sa trabaho adtong adlawa, matud pa ni Sanchez.

Gitataw ni Sanchez nga adunay saksi sa maong insidente lakip na ang tag-iya sa naatrasang sakyanang ni Arcenio kinsa nakasulti nga nidagan paingon sa Talisay ang mga suspek.

Ang mga tulisan nakadala og P485,265 nga kwarta nga gisulod pa og usa ka backpack nga kauban sa P700 mil nga gi-withdraw sa biktima.

“Katong naa sa sakyanan wala sila kakita sa naw’ng kay nag-full-faced helmet man,” sigun pa ni Sanchez.

Matud pa ni Sanchez nga ang security guard nitug-an nga pagkadungog niini og buto sa armas dali unta siyang nidagan padung didto apan gipusil usab siya sa mga tulisan apan ang poste maoy naigo.

Gipasubay na sa Theft and Robbery Section ang mga footage sa CCTV sa kadalanan sa SRP samtang nangayo na pud sila og permiso sa management sa bangko aron matan-aw ang mga kuha sa CCTV. -/EIM (BANAT NEWS)