Biker natagak sa pangpang patay

CEBU, Philippines - Patay ang usa ka biker human kini natagak sa usa ka pangpang nga gibana-banang duna’y giladmon dul-an sa 100  ka tiil sa Campo 6, Barangay Manipis, siyudad sa Talisay, kagahapon sa buntag.

Hapit moabot og tulo ka oras una naugkat ang patay nga lawas ni Cris Ababa, 37, nagtrabaho sa usa ka banko ug residente sa Dakbayan sa Lapu-Lapu. Matud sa kauban ni Ababa nga si Rey Devela, nag-una kini kanila ug gani nagsubay kini sa tunga sa dalan apan kalit lang kining nipakilid sa pangpang.

Nagtuo si Devela nga basin mohunong kini kay gusto motan-aw si Ababa sa palibot ug aron pagkuha og hulagway kay matud pa niya hilig mokuha og mga hulagway ang namatay.

Dugang ni Devela natapsingan ni Ababa sa ngilit sa pangpang ang usa ka hose sa tubig hinungdan nga nawagtangan kini og balanse dayon natumba padung sa bung-aw.

Sumala pa ni Devela pagkakita niini nga padung katagak si Ababa sa pangpang iyaha kining gisinggitan nga panggunit apan nalahos gyud kini padung sa ubos.

“Mao gyu’y akong nabantayan nga na-slide ang iyang ligid natumba gyud siya,” sigon ni Devela.

Ang grupo ni Ababa gikan sa siyudad ug nag-bike sila paingon sa Campo-7 lahos sa Toledo City ug nagsabot nga adto molugsong sa JY Square sa Cebu City.

Human sa hitabo ang mga kaubanan sa namatay nangayo og tabang sa tawo nga nagmotorsiklo ug ilaha dayon nga gi-adto ang kapitan sa Barangay Manipis nga si Kapitan Ema Cabiluna.

Ang chief tanod sa Barangay Manipis Alfredo Panonce Jr. miingon nga  naglisod gyud ang mga rescuers pagkuha sa lawas sa biktima kay gawas nga lawom ang dapit naglisod usab sila sa agianan hinungdan nga miabot gyud og pila ka oras ang pagkuha sa patay nga lawas.

Si Kapitan Cabiluna sa iyang bahin miawhag sa mga moagi sa dapit ilabi na sa mga bikers nga dili moduol sa ngilit nga bahin sa maong karsada aron malikayan ang disgrasya. Ang maong karsada padayon pa karong gipalapdan apan wala pa gihapon mahuman og trabaho.

Samtang nagpaabot nga mahuman kini og trabaho si Cabiluna mimando nga pabutangan og signages ang mga parte niini nga peligro kaayo.

Dihang nakuha na ang patay’ng lawas ni Ababa nakaangkon kini og samad ug bali sa kabukogan sa nagkadaiyang bahin sa iyang lawas.

Ang dalan Manipis nabantog sa mga motorista ug sa mga bikers tungod sa maanindot nga talan-awon niini ug sa katalagsaong karsada nga nipis kilid sa bukid ug pangpang. -/EIM (BANAT NEWS)