PWDs, edaran na patrabahoon
CEBU, Philippines - Giawhag sa Hunta Probinsiyal sa Sugbo ang mga lungsod ug siyudad sa probinsiya sa pagpakig-alayon sa mga kompaniya aron makatrabaho ang mga persons with disabilities (PWDs) ug mga edaran na.
Gihulagway ni Bokal Thadeo Jovito Ouano nga ang mga edaran na nga empleyado “flexible”, loyal sa kompaniya ug mas molahutay sa taas nga oras sa ilang trabaho.
Ang mga edaran nga empleyado makatudlo sab sa mga batan-ong empleyado tungod sa kataas na sa panahon sa ilang kasinatian ug dako kini nga tabang sa pagpauswag sa produksiyon sa ilang trabaho.
Samtang ang mga PWD nagpakita sab kini sa ilang kaugalingon sa pagka-epektibo ug kakugihan sa ilang trabaho diin kasagaran sa mga PWD dunay mga special skill ug talent.
Matud ni Ouano nga nabantayan sa kagamhanan sa probinsiya ang nasinating problema sa mga PWD ug edaran ilabi na sa job hiring diin ang mga employer mo-hire og mga empleyado nga nagpanuigon gikan sa 21 ngadto sa 35-anyos.
Ang mga lapas na sa maong edad bisan og haum kini sa trabaho ang dili mahatagan og kahigayunan.
Dugang ni Ouano nga ang kagamhanan sa probinsiya nihatag og pagtagad sa papel ug kapasidad sa PWD ug edaran diin makatabang sila sa pagpauswag sa nasud dungan ang panghinaut nga ang pribadong sektor makigtinabangay sa mga lokal nga kagamhanan sa pagpauswag sa ilang kaayuhan. - /GMR) (BANAT NEWS)
- Latest