CNU, CTU campus ipabutang sa Toledo, Balamban

CEBU, Philippines - Girekomendar ni Deputy Speaker for the Visayas Gwendolyn Garcia ngadto sa Board of Regents sa Cebu Normal University ug Cebu Technological University ang pagbutang og campus sa Dakbayan sa Toledo        ug Lungsod sa Balamban.

Si Garcia niduso sa House Resolution No. 911 alang sa pagbutang og CNU campus sa Dakbayan sa Toledo City ug House Resolution No. 1006 alang sa pagbutang og CTU campus sa Balamban sa ikatulong distrito nga iyang girepresentaran sa Kongreso.

Ang Dakbayan sa Toledo usa ka third class industrial city sa kasadpang bahin sa Sugbo nga adunay kapin sa 170,000 ka residente sa 38 ka barangay samtang ang Balamban nga usa ka first class municipality nga adunay kapin sa 90,000 ka residente sa 26 ka barangay ang usa sab ka industrial center diin nahimutang ang buhatanan sa barko.

Matud ni Garcia nga ang pagbutang og campus sa CNU ug CTU sa maong mga lugar makadasig kini sa mga ginikanan nga mopatungha sa ilang mga anak sanglit makaminus naman sila sa gasto kay sa Dakbayan sa Sugbo motungha ang ilang    mga anak. (BANAT NEWS)