Landfill sa Carmen aprubado
CEBU, Philippines - Ang hunta probinsiyal mihatag og pagtugot sa operasyon sa sanitary landfill diha sa Barangay Dawis Sur, lungsod sa Carmen.
Ang maong landfill modawat og mga basura dili lang ang gikan sa lungsod sa Carmen kay tanang lungsod sa ikalimang distrito mahimong adto molabay sa ilang basura.
Si Bokal Thadeo Jovito Ouano nagkanayon nga kinahanglan kaayo kini kay ang mga kalungsoran naproblema gyud kun asa dad-on ilang basura subay sa nalatid sa Akta Republika 9003 kon “Ecological Solid Waste Management Act.”
Ang maong landfill gikatakdang anha tukuron sa tipik sa 18 ektaryang luna nga iyaha sa probinsiya.
Tumong sa pagpatukod sa maong landfill ang pagsulbad sa problema sa mga lokal nga kagamhanan kun asa sila molabay sa ilang mga basura. Sa laing bahin, ang kagamhanan sa probinsiyal mihatag og pagtugot sa paggamit sa capital assistance alang sa material recovery facility (MRF) ug vermicomposting kini ubos sa “Sustain SWM Initiatives through Disposal of Garbage and Waste Enforcement for Nature Vermiculture Composting Program”.
Matud ni Ouano nga niadtong tuig 2009 ang kagamhanan sa probinsiya mihatag og pundo ngadto sa component cities, municipalities ug kabarangayan alang sa capital assistance sa MRF ug vermicomposting.
Giingong daghang pundo alang sa maong programa nga wala magamit kay natulog lang ang kwarta nga gideposito diha sa bangko. - /EIM) (BANAT NEWS)
- Latest