Babaye gitulis, gipatay
CEBU, Philippines - Babayeng accountant sa usa ka construction company nga nagdala og dakong kantidad nga kwarta aron unta isweldo sa mga construction workers ang gitulis dayun gipusil patay dihang misukol sa tulisan diha sa South Road Property kagahapon.
Gikan pa ni-withdraw sa kwarta gikan sa usa ka bangko ang biktima nga si Jenely Aquino nga taga Bulacan, kauban sa company driver nga si Delboy Lachia Arcenio.
Ang hepe sa Mambaling Police Station nga si Police Senior Inspector Ed Sanchez niasoy sa Banat News nga sa ilang imbestigasyon nagdala ang biktima og P760 mil nga panweldo sa ilang mga construction workers nga nagtrabaho sa ilang construction site didto sa SRP.
Matud pa ni Sanchez nga giatangan na sa riding in tandem atubangan sa gate sa ilang construction site ang duha ug gipaabot pa nga manaog ang maong biktima sa sakyanan ayha pa gibitad sa usa sa mga tulisan ang bag niini nga gisudlan sa kwarta.
Apan nakiglugnot ang biktima hinungdan nga nangakay-ag ang mga kwarta diha sa ubos ug diha-diha gipusil kini sa tulisan tulo ka higayon hinungdan nga nadala gyud ang backpack nga duna pay nahibiling kwarta. Matud pa nga sa P760 mil nga kwarta, P485,265 lang ang nakuha sa riding in tandem.
Si Aquino gipusil katulo sa iyang ulo matud pa sa desk officer sa Mambaling Police station nga si SPO4 Jelson Solivio.
Daling gidala sa ospital si Aquino sa pagpamasin nga masalbar pa ang maong biktima apan gideklarar kining dead on arrival.
Ang driver niya nga si Arcenio matud pa ni Sanchez naratol ug naatras niya ang sakyanan maong nakabangga kini sa laing sakyanan nga nag-park sa lugar.
Matud pa ni Sanchez nga ang guwardiya sa maong construction site nga si Allan Quimmo Pabuaya wala makakita sa maong panghitabo tungod kay naa siya sulod sa site. Wa isalikway nga adunay inside job nga nahitabo.
“Wa gyud namo gisalikway nga inside job kay nganong nakahibaw man sila sa oras nga muabot ni sa area,” matud pa ni Sanchez.
Ang mga tulisan giingong luwan sa usa ka itom nga Honda XRM nga may plakang GE-49112. - /EIM) (BANAT NEWS)
- Latest