Mga butane gisakmit sa Cordova
CEBU, Philippines - Nasakmit ang 563 ka lata sa mga refilled butane cannisters sa Barangay Catarman, Cordova niadtong Huwebes.
Si SPO1 Elizar Llanes niingon nga nalabyan sa kapolisan nga nag-roving ang pipila ka sako kilid sa karsada sa Purok Catarman 2 diin dunay sulod nga mga lata sa butane ug nasuta ang 143 ka refilled nga butane ug 420 ang wala’y sulod.
Si Llanes nitug-an nga naglisud sila og ila kung kinsa ang tag-iya sa maong mga butane gawas sa giila nga usa ka Meriam Pacaldo nga maoy gitumbok sa mga residente.
Giimbitar si Pacaldo sa buhatan sa kapolisan apan kini nihimakak nga iya ang mga nasakmit nga butane.
“Lisud man itudlo nga siya kay wala man sa iyang possession dihang nasakmit namo ang mga butane,” matud ni Llanes.
Matud ni Llanes nga dunay mga nakakita nga gidiskarga ang maong mga lata gikan sa usa ka puwa nga multi-cab apan wala sab matiman-i ang plate number sa sakyanan.
Ubay-ubay na ang nasakmit sa kapolisan nga mga refilled nga butane cannisters maong matud ni Llanes nga hapit na nila mahurot ang mga tigpamaligya og mga refilled butane sa ilang lugar tungod kay may gi-monitor na sab sila nga tig-supply sa tibuok Cordova.
“Samtang sayo pa, undanga na na. Dugay na man kaayo na nga gibawal sa gobiyerno wa lang gyud natarung og pag-implementar,” mensahe ni Llanes sa mga suppliers sa butane.
Gibana-bana nga muabot sa P7,346 ang kantidad sa nasakmit nga butane nga gidala sa Cordova Police Station. Camille L. Pateres ug Evitha T. Canque (BANAT NEWS)
- Latest
