Mga kawani sa DPS gi-drug test
CEBU, Philippines - Kapin sa 200 ka kawani sa Cebu City Hall nga nadestino sa Department of Public Services (DPS) ang gipakalitan og drug test kagahapon sa City Office for Substance Abuse Prevention (COSAP).
Si Dr. Alice Utlang, hepe sa COSAP, niingon nga karong adlawa nila ipahibawo ang resulta sa drug test kay ang laboratory company nga gi-hire sa City Hall wala dayon kahuman sa ilang gimbuhaton.
Matud ni DPS assistant chief John Paul Gelasque, nga ang mga kawani nga gi-drug test nadestino sa garbage collection, street lighting, street cleaners ug mga administrative staff.
Sila si Gelasque ug DPS chief Roberto Cabarrubias wala na moapil sa pagpa-drug test kagahapon kay nahuman na sila ug ubang mga kawani sa DPS kinsa pareho nga negatibo.
Daghan sa mga garbage collectors sa kabarangayan ang namatud-an nga tiggamitan og ilegal nga drugas human sila napositibo sa drug test.
Si Gelasque niingon nga sa kapin sa 200 ka kawani sa DPS nga gi-drug test kagahapon diin wala ra kaabot og 20 ang mga regular ug kadaghanan mga kaswal.
Base sa lagda sa City Hall nga kadtong mga kaswal nga kawani, diha-diha taktakon sa serbisyo kun mapositibo sa confirmatory test samtang ang mga regular nga kawani pasakaan og kasong administratiba. (BANAT NEWS)
- Latest
