Tagsa ka sakong bugas sa Barangay Ermita workers
CEBU, Philippines - Mipagawas og kamandoan si Cebu City Mayor Tomas Osmeña nga mohatag og tag usa ka sakong bugas sa mga empleyado sa Barangay Ermita human nga sulod sa upat ka buwan wala pa gihapon sila makadawat sa ilang sweldo.
Ang Barangay Ermita duna’y dul-an 150 ka mga empleyado nga wala pa gihapon makadawat sa ilang sweldo sukad nga nasuspenso ang ilahang Barangay Kapitan nga si Felicisimo “Imok” Rupinta.
Si Osmeña nagtuo nga nasulbad na ang maong problema ug gani sa mga mantalaan na lang kini sa nasayod mahitungod sa sitwasyon sa mga empleyado sa barangay.
Ang pundo alang sa planong paghatag og bugas adto kuhaon sa Accelerated Social Amelioration Program (ASAP) Funds.
Matud sa mayor mahimo niya kining ma-justify sanglit tataw man ang kalisod nga nasinati sa mga empleyado kay wala’y sweldo nga nadawat.
Nasayran nga katunga sa mga kawani sa Ermita giingong wala na motrabaho pa ug nangita lang una og lain nilang panginabuhian.
Si Atty. Winifredo Orcullo, kinsa maoy gitahasan ni Osmeña nga caretaker sa barangay mitug-an nga dili gihapon siya mahimong makapirma og mga dokumento sanglit wala pay tubag ang Department of Interior and Local Government sa ilang hangyo nga tugutan kini makapirma.
Apan gihimug-atan usab ni Orcullo nga bisan og aduna na siya’y pagtugot dili gihapon niini mahimong i-release ang sweldo sa mga empleyado tungod kay ang Commission on Audit(COA) mimando sa Land Bank of the Philippines nga dili i-release ang kwarta sa barangay kay pakyas sila sa pag-liquidate sa disbursement sa funds nila kaniadto.
Makisusi si Osmeña kun kinsa ang responsable diha sa barangay Ermita nganong wala makasumetir sa mga rekisitos aron pasakaan og reklamo. (BANAT NEWS)
- Latest