Tunnel sa Plaza Independencia sirad-an
CEBU, Philippines - Ang mga motorista gipahibalo sa kadagkoan sa Cebu City Transportation Office (CCTO) nga sirad-an nila karong buntag ang tunnel nga molagbas sa Plaza Independencia paingon sa South Coastal Road.
Ang operations chief sa CCTO nga si Isko Ouano mitug-an nga ang pagsirado sa tunnel magsugod alas -7 sa buntag ug molungtad hangtod sa udto, kun mahuman na ang pag-ayo sa CCTV camera sulod sa tunnel.
Ang tunnel nga gikan sa dapit sa karaang Compania Maritima anaa molagbas ilawom sa Plaza Independencia ug molusot didto na sa Serging Osmeña Avenue, ang karaang McArthur Boulevard.
Matud ni Ouano nga kadtong mga motorista nga gikan sa Serging Osmeña Avenue ug moagi unta sa tunnel, mahimong anha moagi sa Legaspi Extension ug modesilya sa M.J. Cuenco Avenue kilid sa Plaza Independencia, lahos na sa South Coastal Road.
Samtang kadtong gikan sa South Coastal Road, anha usab sila moagi sa karsada kilid sa karaang building sa Compania Maritima ug lahos na sa M.J. Cuenco Avenue. Sanglit gituohan nga ang pagsirado sa tunnel makamugna og kahuot sa mga sakyanan sa M.J. Cuenco Avenue, destinohan og mga traffic enforcers ang mao nga lugar.
Usa sa makapasamot sa problema sa trapiko diha sa habig sa Plaza Independencia mao ang mga sakyanan nga maghatud og mga pasahero ug mga kargamento alang sa mga barko nga midunggo sa Pier 1, ilabi na sa hapon.
Mga motorista nga sinati sa mao nga dapit miawhag sa CCTO nga unta destinohan nila og traffic enforcer ang atubangan nga bahin sa Waterfront Police Station nga maoy kanunay’ng makasugat og grabeng problema sa paghuot sa mga sakyanan. (BANAT NEWS)
- Latest
