Seniors makadawat karon og tag P1K

CEBU, Philippines - Dili mominus 67 mil ka mga benepisyaryo nga mga senior citizen ang makadawat sa pinansyal nga tabang gikan sa lokal nga pangagamhanan sa Sugbo karong adlawa.

Gikompirmar ni Lourdes Ann D. Limpangog, Executive Assistant sa Office of the Senior Citizen kon OSCA nga karung adlawa ang pagpanghatag sa P1,000 nga tabang pinansyal diha sa nagkadaiyang barangay.

Giklaro ni Limpangog nga kinahanglan gyud nga ang benepisyaryo mismo ang mokuha sa ilang hinabang ug kadtong mapakyas hatagan og 10 ka adlaw aron ilaha kining makuha.

Kung molapas sa 10 ka adlaw ibalik ang budget ngadto sa City Treasurers Office ug dili na mahimomg makuha sunod bulan.

 Gitataw usab niya nga kun ang benepisyaryo mapakyas sa pagkuha sa ilang benepisyo sa sagunson sa tulo ka bulan tangtangon kini sa programa. Hinuon, aduna pay higayun nga mo-apply pagbalik.

Ang binulan nga distribusyon sa pinansyal nga tabang karon mao ang ika-upat nga hugna karong tuiga.

 Samtang giawhag sa hunta probinsiyal ang mga lokal nga kagamhanan sa mga siyudad ug kalungsoran sa probinsiya nga mo-update sa listahan sa bonafide senior citizens diha sa ilang lugar.

Si Bokal Jose Mari Salvador miawhag usab nga ang kalungsoran ug siyudad mosumitir og kopya diha sa iyang buhatan lakip na ngadto sa Provincial Social Welfare Office (PSWDO) sa updated nga listahan sa mga senior citizen.

Tumong niini nga ang probinsiya dunay accurate population sa senior citizen  aron mahibaw-an kung pila ang gidaghanon sa senior citizen nga mahimong beneficiary sa medical-health mission, special benefits ug ubang social services nga ihatag sa probinsiya.

Base sa record sa PSWDO ang tibuok probinsiya duna kini sobra sa 200 mil nga rehistrado sa Senior Citizen Federations apan gusto sa hunta mahibaw-an kun  pila gyud sila ka buok karon. Brenda D. Batuto ug Gerlie N. Macalua (BANAT NEWS)