Taho gipaagi sa 911
CEBU, Philippines - Duha ka ilegal nga makina ang nasakmit sa kapolisan sa Siyudad sa Talisay sa Sitio Mahayahay, Barangay Cansojong sa maong dakbayan kagahapon sa kadlawon.
Ang kapolisan nakadawat og mensahe gikan sa 911 ug nipahibawo nga padayon ang ilegal nga kalihukan sa maong lugar diin ang mga menor de edad maoy nangabuang sa maong duwa.
Dali nga niresponde ang mga awtoridad hangtud nga naglumba sa pagpanagan ang mga batan-on.
Usa ka video karera machine ingon man usa ka moli-moli machine ang nasakmit sa mga awtoridad.
Hinoon pakyas ang kapolisan sa pagsikop sa mga nagduwa sa ilegal nga makina tungod sa ilang kapaspas nga nakapanagan.
Ang mga makina nga ilang nasakmit nalakip na sa ubay-ubay nila nga mga makinang nagtapun-og. (BANAT NEWS)
- Latest