Tulo sikop sa buy-bust sa probinsiya
CEBU, Philippines - Sikop sa managlahing buy-bust operation sa Probinsiya sa Sugbo ang tulo ka tawo niadtong Miyerkules.
Unang nasikop sa may Logarta St., Barangay Luyang, Lungsod sa Carmen ala- una sa hapon mao si Noel Delan, 35-anyos, residente sa maong lugar.
Matud ni Police Chief Inspector Christian B. Torres, ang kasamtangang hepe sa Carmen Police Station, nga nasikop si Delan human kini nakahimo og grave threats sa niresponde nga sakop sa kapolisan nga nidakop niini ug nakuhaan kini og duha ka putos sa gituohang shabu.
Ang dinakpan nagtingkagol na sa lock up jail sa Carmen Police Station.
Ikaduhang operasyon, nasikop sa may Sitio Puso, Barangay Buluang, Lungsod sa Compostela si Reynam Lumantao, 38-anyos, minyo, wala’y trabaho, residente sa Barangay Magay, ug si Roldan Ruta, 27-anyos, ulitawo ug usa ka habal-habal driver.
Ang duha nasikop human naaktuhan nga namaligya og ilegal nga drugas hinungdan nagtingkagol na kini karon sa lock up jail sa Compostela Police Station ug gipaabot ang pagsang-at og tukmang kaso batok sa mga dinakpan. (BANAT NEWS)
- Latest
