3 tanod, 1 loader positibo sa drugas

CEBU, Philippines - Tulo ka tanod ug usa ka garbage collector gikan sa duha ka barangay sa Dakbayan sa Sugbo ang labing ulahi nga napositibo sa paggamit og gidiling drugas dihang gipakalitan sila pag-drug test sa mga sakop sa Cebu City Office for Substance Abuse Prevention (COSAP) niadtong Martes.

Si Dr. Alice Utlang, pangulo sa COSAP, nibutyag nga ang upat ka bag-ong napositibo gikan sa Barangay Kamputhaw ug Agsungot.

Sa Kamputhaw, duha ka tanod ug usa ka garbage loader ang napositibo samtang sa Agsungot, usa ka tanod usab ang napositibo sa drugas.

Niabot na og 128 ang tanang kawani sa barangay sa Dakbayan sa Sugbo nga napositibo sa paggamit og ilegal nga drugas sukad niadtong Enero. Matud ni Utlang nga ang garbage loader maoy labing daghan nga tiggamitan og drugas ug gisundan sa mga tanod.

Si Utlang niingon nga kinahanglang estriktuhon na gyud unta sa mga kapitan sa kabarangayan nga kadtong ilang kawani nga mapositibo sa drug test tangtangon gyud sa ilang mga trabaho.

Si Mayor Tomas Osmeña nidasig gyud sa mga barangay kapitan nga sundon ang iyang lakang nga ang mga mapositibo sa drugas nga kawani sa City Hall iya dayon nga palagputon sa trabaho. (BANAT NEWS)