Mga sibilyan namakwit gawas sa Marawi City
CEBU, Philippines - Mil dosentos ka mga tawo ang kasamtangan karon nagpasilong sa Provincial Capitol, City Hall sa Marawi City ug kampo sa militar maoy opisyal nga gibakwitan sa mga residente samtang nagpahigayon og clearing operations ang mga sakop government forces.
Kini samtang nagpadayon ang binakbakay sa siyudad tali sa security forces ug mga Maute group ug wala’y hunong ang pagbakwit sa mga tawo. Kini ang gitug-an ni Lt. Col. Joar Herera, ang tigpamaba sa 1st Infantry Tabak Division nga nahinabi sa Banat News.
Matud pa ni Herera, 700 ang anaa sa Provincial Capitol ug 500 ang sa City Hall nga maoy gihimong evacuation area sa lokal nga pangagamhanan.
Sumala pa ni Herera, adunay uban mga residente sa Marawi ang namakwit padulhog sa Iligan City ug Cagayan de Oro kuyog ilang mga pamilya.
Dugang pa ni Herera, 13 na ka mga gituohang sakop sa Maute group ang nakalas diin nakuhaan kini og mga IED components, M16 ug nagkadaiyang mga kagamitan niini.
Gitug-an ni Herera nga lima ang nakalas gikan sa militar ug 31 na ang samaran.
Awhag usab ni Herera sa mga netizens nga dili magpataka og post sa mga social networking site aron dili makahatag ug kabalaka sa katawhan.
Si Herera, nitug-an nga aduna na sila’y linya karon sa kuryente ug padayon usab nila karon gisusi ang giingong pagkawala sa pari, mga staff niini ug sa pipila ka mga tawo nga giingong gi-hostage sa mga sakop sa armadong grupo.
Ang Catholic Bishops Conference of the Philippines (CBCP) mikondenar sa paggamit sa mga terorista sa mga Kristiyano isip taming. (BANAT NEWS)
- Latest