Ikonsulta kun mag-Martial Law

CEBU, Philippines - Mga opisyales dinhi sa Sugbu miingon nga kinahanglang tun-an una pag-ayo kun dunay planong magdeklarar og martial law dinhi sama sa gibuhat ni Pres. Duterte didto sa Mindanao.

Si Gob. Hilario Davide III miingon nga angay tun-an pag-ayo kun aduna bay igong basehan nga iapil ang Visayas.

“I think that’s not ripe at the moment, there has to be sufficient basis gyud,” matud ni Davide. 

Si Duterte namahayag nga posibleng modeklarar usab siya og martial law sa Visayas tungod kay duol ra kini sa Mindanao nga gihamok karon sa terorismo.

Si Bise Gobernador Agnes Magpale sa iyang bahin masaligon nga lahi gyud ang martial law ni Duterte itandi sa martial law sa panahon ni kanhi presidente Ferdinand Marcos. Uyon siya nga iapil ang Visayas sa martial law kun gikinahanglan.

Sumala pa niya, bukas pagdawat ang Sugbo sa mga mamakwit gikan sa Mindanao apan kinahanglan nga monitoron aron pagsigurong dili sila magdala og kagubot dinhi.

Apan si Cebu City Mayor Tomas Osmeña sa iyang bahin miingon nga kinahanglang konsultahon una ni Duterte ang lokal nga mga opisyales una modeklarar og martial law dinhi.

Nakigtagbo usab ang siyudad sa Muslim Community pinaagi ni  kanhi konsehal Alvin Dizon, tsirman sa Anti-Discrimination Commission sa siyudad  aron magpatabang nga mamentinar ang kahapsay ug kalinaw dinhi.

Gusto usab niya nga mopasar og ordinansa nga magtugot sa kapulisan nga makadala sa ilang mga armas sulod sa mga malls.

Samtang si Col. Medel Aguilar, sa Central Command (CentCom) miingon nga hugot na karon ang seguridad sa kadagatan taliwala sa Visayas ug Mindanao tungod sa nagpatrolyang mga tropa sa Philippine Navy ug gipahugtang seguridad sa mga coastal areas.

“Of course sinabi niya yun (martial law sa Visayas), but considering the situation right here, we have a very responsible local chief executives.

We have a very cooperative people and communities, so right now we are in good hands. I don’t think lalala, ang situation doon. Malaki ang tiwala natin sa ating mga tao  at sa ating mga kasamahan,” si Aguilar miingon.

Gihimo niyang sanglitanan ang pagkahurot og kamatay sa mga Abu Sayyaf nga nisuway pagsud sa Bohol sa miaging buwan.

“That was a message that you cannot just go to other places, our people here is against violence. Our people here love peace,” matud pa ni Aguilar apan siya nanawagan sa publiko nga magmabinantayon ug isumbong dayon sa mga otoridad kun duna sila’y makitang kadudahan ug dili i-post sa social media.

Ang direktor sa Police Regional Office-7 Noli Taliño miingon nga wala pa sila’y nadawat nga taho nga adunay mga nangabot nga mga evacuees gikan sa Marawi City paingon sa rehiyon.

Gimandoan niya ang kapolisan nga kanunayon ang paghimo og checkpoint sa mga pampublikong lugar lakip na pud ang mga pantalan. Le Phyllis F. Antojado, Decemay P. Padilla ug Camille Pateres (BANAT NEWS)