DSWD-7 nagpadala’g food packs sa Marawi
CEBU, Philippines - Ang Department of Social Welfare and Development-7 nagpadala na og 6,600 family food packs kagahapong adlawa alang sa nga evacuees sa Marawi City nga bag-o lang giatake sa Maute Group.
Matud pa ni Leah Quintana, ang information officer sa DSWD-7 nga 10,000 ka family food packs gyud ang ipadala nila apan 6,600 ra man ang makarga sa upat nga wing vans mga maoy kargahan niini. Ang maong kargamento gipaabot nga moabot sa Iligan City karong hapon diin kuhaon ra usab kini sa ilang counterpart padung na sa Marawi City.
Samtang ang dugang nga 3,400 family food packs ipadala usab kini karong adlawa.
Ang family food packs adunay unom ka kilong bugas, walo ka de lata (canned meat ug canned fish) ug unom ka pakete nga kape. Ang pagpadala sa maong mga food packs gimando kini sa ilang buhatan sa Manila aron tabangan ang Marawi City.
Ang kagamhanan sa probinsiya andam mohatag og hinabang sa mga naipit sa kagubot didto sa Marawi City sumala pa ni Gob. Hilario Davide, III.
Plano niyang makig-estorya sa mga lider sa mga Muslim dinhi sa Sugbo aron ipadayag nga ang probinsiya andam motunol og tabang ngadto kanila.
Matud ni Davide nga posibleng dunay mga Muslim nganhi sa Sugbo nga dunay mga paryente ngadto sa Marawi City nga nagkinahanglan og tabang.
Si Davide mipadayag sa iyang simpatiya ngadto sa mga kaigsuonang Muslim ug mipasalig nga sa probinsiya sa Sugbo wala’y mahitabong diskriminasyon kanila dinhi. Gipasabot ni Davide nga ang Muslim ug Kristiyano parehong managsuon.
Nanawagan siya kanila nga tabangan ang Sugbo nga dili maabot dinhi ang kagubot. Mitchelle Palaubsanon ug Brenda D. Batuto (BANAT NEWS)
- Latest
