“Druglord” patay sa polis

CEBU, Philippines - Gitumbok nga numero unong High Value Target tungod sa kalambigitan sa ilegal nga drugas dinhi sa Central Visayas napatay human nakigpinusilay sa mga sakop sa Regional Drug Enforcement Unit-7 ug Regional Intelligence Division-7 atol sa gipahigayong buy-bust operation sa Barangay Bakilid, Dakbayan sa Mandaue kagahapon sa buntag.

Gidala pa sa Vicente Sotto Memorial Hospital dayon gibalhin sa Chong Hua Hospital ang suspek nga si Christian Tabanao Aquino nga gikonsiderar nga usa ka “druglord” human makaangkon og tulo ka samad pinusilan sa iyang tiyan, apan pag 10:30 sa buntag mitaliwan na ang maong suspetsado.

Nakuhaan si Aquino og duha ka gagmay’ng paketeng gidudahang shabu ug ang iyang gigamit nga pusil batok sa kapulisan nga 38 kalibre nga revolver.

Si Senior Supt. Jonathan Cabal, hepe sa RID-7 sa Police Regional Office-7 nibutyag sa Banat News nga samtang ilang gidala sa tambalanan si Aquino nitug-an kini nga sakop siya sa ni-surrender na nga niangkong drug lord nga si Franz Sabalones.

Si Cabal mibutyag nga gawas kang Sabalones, daghan pa siyang mga pangalan nga gibutyag nga mga drug personalities nga kakunsabo niini apil ang usa ka kanhi pulis nga si alyas Barandoy.

“Parang dying declaration ‘to na wala naman siyang chance na magsinungaling pa dahil he cannot think of lying,” matud pa ni Cabal.

Manguha pa sila’g dugang impormasyon bahin sa mga gipangalanan ni Aquino ug sa mga naka-encode sa sa cellphone niini.

Si Police Chief Inspector Jose Rovic Villarin, hepe sa Moalboal Police Station nitug-an sa Banat News nga ni-surrender si Aquino kanila niadtong Oktubre sa niaginig tuig tungod sa Oplan Tokhang, apan paglabay og duha ka buwan, nibalik kini sa iyang negosyo sa shabu.

“He was one of the target namo, wala na siya mopakita sa Moalboal,” si Villarin miingon.

Matud pa niya nga naglabang-labang sa Mandaue ug Dumaguete si Aquino kay nakatimaho na kini nga init na siya sa mga mata sa pulis sa ilang lugar.

Sumala pa ni Villarin nga ang mga bata-bata ni Aquino padayon sa pagpadagan sa negosyo niini bisan wala ilang amo.

“Kaning mga bataa nga nadakpan namo, si Christian g’yud ang ilang itug-an nga amo,” matud pa ni Villarin.

Dugang pa ni Villarin nga sayo ning buwana duna sila’y gipahigayonang drug buy- bust operation sa ilang lugar nga gituohang usa sa mga tawo ni Aquino.

Apan misukol pud sa pinusilay si Danilo Pino Delfino hinungdan nga napatay nila kini.

 “Alam naman natin na iyung mga underlings ay they will seek for another bosses  hopefully we can or conduct operation against them. Momentarily hihina ang galaw ng mga co-horts but they will think for other sources,”dugang ni Cabal.

Samtang 89 ka mga tawo ang gidakop sa mga operatiba sa Cebu City Police Office atol sa Oplan Pokemon.

Matud pa ni Senior Inspector Narrolf  Tan, sa City Intelligence branch, gawas sa 89 ka mga tawo, nakasakmit usab sila og upat ka dagkong pakete, 29 ka medium ug 124 ka gagmay nga paketeng shabu nga mitimbang og 300.78 gramos nga mobalor og dul-an sa P1.1 milyon.

Nakasakmit usab sila og 31 ka mga gambling machines ug lima ka mga armas,P6 mil nga gituohang halin sa illegal nga drugas.

Sa laing operasyon, nadakpan ang laing High Value Target ug number six sa listahan sa drug personalities sa Consolacion sa buy-bust operation sa Sitio Laray, Pitogo,  kagahapon sa hapon.

Ang dinakpan giila nga si Lennfrey Malasang Garces alyas Kolboy, 33, kinsa nakuhaan og gidudahang shabu nga mobalor og P224, 200.

Samtang nadakpan usab ang magtiayong Emerson Varon Lim, 29 ug Bernadetha Ycong  Lim , 33, sa mga sakop sa PDEA-7  diha sa Spolarium St., Duljo-Fatima, Cebu City. Ang duha nakuhaan og shabu mokabat na kini og P865,400. Camille Pateres, Romeo Limpangog ug Rowena Capistrano (BANAT NEWS)