PRO-7 ug PNP patches sa mga sakop sa NYPD gipatangtang

CEBU, Philippines - Andam nga tangtangon sa New Young Pilipino Defenders (NYPD) ang patches sa Police Regional Office (PRO-7) nga anaa sa ilang uniporme.

Gibutyag ni Rey Duterte Abad, ang adviser ug lider sa NYPD nga gimanduan sila ni PRO-7 Regional Director PCSupt. Noli Taliño sa pagtangtang sa patches sa ilang uniporme paglikay sa kasamok ug kontrobersiya.

Si Butch Ilagan, pangulo sa NYPD mipasabot nga boluntaryo ang ilang grupo isip mga force multiplier sa PNP ug accredited sila sa PRO-7.

Nitumaw ang maong grupo human sila maoy gipasanginlang nagpabuto og armas dihang nagubot ang yuta sa may Dawis sa Brgy Tabunok, Dakbayan sa Talisay niadtong miaging semana.

Giangkon ni Abad nga miadto sila sa lugar niadtong Biyernes ug dili Sabado diin aduna’y pagpabuto nga nahitabo. Gani iyang gihulagway nga malinawon ang ilang pagbisita sa dapit.

Niabot lang sila sa lugar kay aduna’y nagpatabang kanila tungod kay dili na sila makaagi sa karsada kay gikoral. Iyang gipasabot nga nitabang lang sila sa mga tawo nga gidaug-daug sa lugar.

Dugang ni Abad nga nagpaila siya sa iyang kaugalingon ngadto sa mga tawo nga nag-develop sa dapit ug iyang giklaro nga uyuan niya si Presidente Rodrigo Duterte kay ig-agaw man kini sa iyang inahan. Iya sab giklaro nga wala siya manghambog niini.  Hinuon iyang giangkon nga aduna sila’y sipyat kay wala sila makig-coordinate sa Talisay City Police hinungdan nga daghang istorya nga nanggawas. (BANAT NEWS)