Infirmary tukuron sa CPDRC

CEBU, Philippines - Gihatagan og pagtugot sa Hunta Probinsiyal sila si Gobernador Hilario Davide, III ug Provincial Health Office Dr. Rene Catan nga moaplay og permit to construct ug license to operate an infirmary sa Cebu Provincial Detention and Rehabilitation Center (CPDRC).

Adto moaplay ang Kapitolyo og permit sa Health Facilities and Services Regulatory Bureau sa Department of Health.

Si Bokal Christopher Baricuatro nagkanayon nga ang CPDRC usa ka provincial jail ug detention facility nga gidumala sa kagamhanan sa probinsiya.

Tumong sa maong proyekto nga matubag ang problema sa panglawas sa mga priso ug gikinahanglan nga i-renovate ug i-upgrade ngadto sa primary health care unit ang klinika sa maong pasilidad.

Kahinumduman nga sa milabay’ng tuig, miabot ngadto sa 10 ka piniriso sa CPDRC ang namatay kay maglisud sa pagginhawa. Samtang ang ubang piniriso naghambin sa sakit nga tuberculosis ug pneumonia. Gawas sa maong mga sakit, adunay uban nakasinati usab og mga sakit sa panit ug dunay positibo sa HIV. (BANAT NEWS)