TINAGSIP: Utility gidunggab

CEBU, Philippines - Nalandig sa tambalanan ang utility worker sa usa ka tunghaan human siya gidunggab sa Urban Poor, Maghaway, Dakbayan sa Talisay niadtong Martes sa gabii. Ang biktima mao si Joseph Java, 36, taga Kadikay, Lawaan 3 sa nahisgutang siyudad, utility worker sa Maghaway Elementary School, samtang ang suspek nailhan nga si Rodulfo Mancia, 59, nagpuyo sa maong lugar.

Si PO3 Jason Del Campo sa Talisay City Police Station nibutyag nga nipalit lang og sigarilyo ang biktima duol sa tunghaan dihang kalit lang gidunggab sa dughan sa suspek.

Bukog gipa-autopsy

Nakuykoyan nga bukog sa naugdaw nga panimalay ni Francisca Nacional sa Matumbo, Pusok, Dakbayan sa Lapu-Lapu ang gipadala ngadto sa PNP Crime Laboratory kagahapon sa buntag.

Kini aron pag-ila kung ang bukog iya ba sa tawo o mananap nunot sa pagkahanaw sa 8-anyos nga anak ni Nacional dihang niulbo ang sunog ug wala pa gyud igkita. Si Ruel Nacional nga uyoan sa gipangita nga bata maoy nakakuykoy sa bukog dapit sa nahimutangan sa pultahan sa naugdaw nga panimalay ni Francisca. Romeo T. Limpangog ug Shaine L. Maniego

Gilungkab sa ig-agaw

Giunay paglungkab sa 50-anyos nga lalaki ang iyang ig-agaw sulod sa Lopez Compound, Pardo, Cebu City niadtong Mayo 22 sa alas 10 sa buntag.

Gitumbok ang suspek nga si Eduardito Lopez uban ang iyang anak nga si Therese Lopez, 27, ug kapuyo nga si Whelter Liloan nga nilungkab sa balay ni Princess Lopez, 29, kinsa nakuhaan og TV, plato, tubo, electric wires, sin ug gasol.

Gibutyag sa biktima nga wala siya sa ilang balay nagpuyo kay nibalhin siya sa Talisay ug ang iyang igsuon nga si Anna Alexandra Lopez, usa ka call center agent, ang nagpuyo na sa iyang balay. Evitha T. Canque

Nalatayan sa 10-wheeler

Nalatayan ang 19-anyos nga lalaki sa 10-wheeler truck dihang natumba ang gisakyan niining motorsiklo sa Dakbayan sa Carcar niadtong Martes sa gabii.

Gideklarar nga dead-on-arrival sa tambalanan si Philipp Joshua Domingo Pedrosa, taga Nivel Hills, Busay, Siyudad sa Sugbo, samtang ang nagmaneho sa truck mao si Jeffrey Velasco Mauricio, 27, taga Sandigan Island, Loon, Bohol.

Si Pedrosa giingong nawagtangan sa kontrol sa motorsiklo tungod sa kadangog sa dalan gumikan sa pagbunok sa uwan ug natumba samtang nagsunod ang truck nga paingon unta sa Argao. Camille L. Pateres

Naglakaw gitigbas

Kalit lang gitigbas sa lalaki nga may sakit sa pangisip ang 33-anyos nga lalaki nga naglakaw lang sa dalan sa Simala, Sibonga niadtong Martes sa hapon. Gitigbas gamit ang sanggot si Nicholas Amado Visitacion, 33, sa usa ka Oliver Moratas Tañola, 32, parehong residente sa naasoy’ng lugar.

Nakaangkon og samad tinigbasan si Visitacion sa iyang agtang ug sa tiyan ug dali nga gidala sa tambalan samtang ang suspek ang gikustodiya sa Sibonga Police Station. Camille L. Pateres

Sekyu nitahan

Nitahan kagahapon sa kapolisan sa Dakbayan sa Sugbo  ang security guard nga nakapusil patay sa chairman sa advisory council sa Dipolog City nga si Michael Malacca niadtong Mayo 6. Ang suspek mao si Nelson Ubas, 21, lumad nga taga Ginatilan, Cebu kinsa nitataw nga nahadlok siya sa iyang kinabuhi human niya nasayri nga niinit na ang kaso batok kaniya.

Tungod sa pag-ikyas ni Nelson, gidakop sa kapolisan ang inahan nga si Basilia Ubas kinsa gipasanginlan nga maoy nagpaikyas sa anak. Camille L. Pateres (BANAT NEWS)