Drug test sa inmates optional lang

CEBU, Philippines - Nagkanayon si Cebu City Jail Warden Superintendent Arnel Peralta nga ang direktiba gikan sa ilang buhatan nga ang ipaubos lang sa mandatory drug test mao ang mga uniformed personnel ug optional lang sa mga inmates aron dili makalapas sa tawhanong katungod.

Buot ni Cebu City Mayor Tomas Osmeña nga mandatory ang drug test sa mga inmates sa City Jail aron dili makabalibad kadtong nagsige lang gihapon sa ilang bisyo. Apan si Peralta niingon nga wala sila’y mahimo niini sanglit mao man ang nalatid sa balaud ug dili sab nila mahimong pugson ang mga piniriso.

Si Osmeña mangayo og laing legal advice mahitungod niini aron tun-an ang kinatibuk-ang sitwasyon sama sa paghatag og ayudang pinansiyal ngadto sa Bureau of Jail Management and Penology. (BANAT NEWS)