Martial law gipatuman

CEBU, Philippines - Daghan ang nakurat ug gibati’g kabalaka tungod sa posibleng pangabuso sa kapolisan ug militar human nga si Presidente Rodrigo Duterte mideklarar og martial law alang sa kinatibuk-ang Mindanao sugod kaniadtong Martes sa gabii.

Si Duterte mideklarar og martial law human nga dunay mga sakop sa ISIS ug Maute Group nga mihimo og teroristang kalihukan didto sa Dakbayan sa Marawi, Lanao del Sur kaniadtong Martes ug gikataho nga nangidnap og pari gikan sa usa ka simbahan, ug ubang sibilyan. Didto sa Russia si Duterte diha nga ang mga terorista miatake sa Marawi City hinungdan nga abtik nga gideklarar sa presidente ang martial law sa Mindanao ug miingon nga mahimong paabton niya og usa ka tuig, ug dili lang kay duha ka buwan.

Base sa Konstitusyon, sulod sa 48 oras gikan sa pagdeklarar sa martial law, kinahanglang padad-an dayon sa presidente og pormal nga kumunikasyon ang Kongreso aron diskutihon kun angay ba nga ipadayon ang pagpatuman sa gideklarar nga balaod militar.

Gipasalig ni Duterte nga kumbatihon gyud sa kasundalohan ug kapolisan ang mga teroristang Maute ug ISIS nga nagdala lang og kagubot dinhi sa nasud ug dili sila hatagan og higayon nga makakontrolar og bisan gamay’ng luna sa nasud.

Kadtong mga nakasinati na sa martial law atol sa administrasyon ni kanhi presidente Marcos gibati og dili tiaw nga kabalaka. Apan ang Korte Suprema mitataw nga nagpadayon ang mga hukmanan sa paghusay sa mga kaso.

Ang mga legal expert nagkanayon nga bisan og gipatuman ang martial law sa Mindanao, wala suspensoha ang Writ of Habeas Corpus ug kadtong mga tawo nga dakpon sa militar ug mga polis pabuhian kun dili sila mapasakaan og kaso paglabay sa tulo ka adlaw.

Dinhi sa Sugbo

Ang kadagkoan sa National Commission on Muslim-Filipinos (NCMF) nga gipangulohan ni Regional Director Malo Manonggiring mipasalig nga ang mga Muslim communities dinhi sa Sugbo mopahibalo gyud dayon sa mga tinugyanan sa balaod kun makamatikod sila og mga tawo nga kadudahan sa ilang tagsa-tagsa ka dapit.

Matud ni Manonggiring nga nakurat siya pagkasayod nga giatake sa mga ISIS ug Maute Group ang Marawi nga usa ka malinawon ug malambuon nga dakbayan sa Mindanao. Si Police Regional Director Noli Taliño miingon nga takus ang kapolisan dinhi sa rehiyon sa pagsanta sa mga teroristang kalihukan.

Si Mayor Tomas Osmeña nga giilang Sultan sa mga Muslim sa Sugbo malaumon nga ang iyang mga sakop mosuporta gyud sa pagpatunhay sa kalinaw dinhi sa atong dapit. Samtang si Gobernador Hilario Davide III miingon nga tukma gyud ang gihimo ni Duterte nga mideklarar dayon og martial law.

Nagtuo si Davide nga daghang taga Mindanao ang molangyaw sa laing lugar, apil na sa Sugbo, aron makalikay sila sa estrikto nga pagpatuman sa balaod didto sa Mindanao. Bisan gani dinhi sa dakbayan kagahapon, gipatuman dayon ang subsob nga mga checkpoint sa kapolisan. Sila si Davide ug Osmeña miawhag sa katawhan nga magmabinantayon aron mapatunhay ang kahusay ug kalinaw dinhi sa Sugbo ug ubang bahin sa Kabisay-an.

Si Konsehal Dave Tumulak, deputy mayor for peace and order, miawhag niadtong hilig sa social media nga dili magpataka pag-post og inpormasyon nga makapahadlok sa katawhan, ilabi na og dili tinuod.

Matud ni Cebu City Vice Mayor Edgardo Labella nga kinahanglang magpabiling kalma ang katawhan apan mabinantayon sa tagsa-tagsa nila ka palibot. Rowena D. Capistrano, Decemay P. Padilla, Le Phyllis F. Antojado, Camille Pateres ug Mitchelle Palaubsanon (BANAT NEWS)