Guardo balik konseho na

CEBU, Philippines - Makabalik na sa iyang katungdanan si suspended Cebu City Councilor Jerry Guardo.

Gibutyag ni Konsehal Guardo nga nakadawat og tawag ang iyahang buhatan gikan sa Department of Interior and Local Government (DILG) Cebu City nga nagpahibawo nga mahimo na siyang mobalik sa serbisyo human siya masuspenso.

Apan kay wala pa siya’y nadawat nga memorandum, iya kining gikonsulta sa iyang mga kaubanan sa Bando Osmeña Pundok Kauswagan (BOPK) diin ilang nadesisyonan nga mas maayong maghuwat una sa memo gikan sa ulohang buhatan sa DILG aron dili makwestiyon. Kini aron sab mapakita niya kang Vice Mayor Edgardo Labella nga na-reinstate na siya ug mahimo nang makatambong sa regular session sa konseho sa siyudad.

Kahinumduman nga nasuspenso si Guardo gumikan sa kasong simple neglect of duty dihang kapitan pa kini sa Barangay Sambag 1, ug kay konsehal naman siya karon  sa siyudad, ang Ombudsman mipagawas og desisyon nga inay suspensiyon, bayran na lang sa konsehal ang penalty tugbang sa iyang sweldo niadtong kapitan pa siya. Gikalipay ni Guardo ang maong kalambuan ug gani wala niya matago ang iyang kaikag kay makabalik na siya sa pag-alagad sa mga Sugboanon.

Sa pagbalik niya sa konseho, mahimo nang majority bloc ang BOPK ug sigon ni Mayor Tomas Osmeña, ang unang buhaton mao ang pag-reorganize sa mga komitiba. Hinuon sabutan pa kini sa partido. (BANAT NEWS)