Nagsag-ob, naglawog sa manok gipamusil

CEBU, Philippines - Gipusil sa iyang silingan ang lalaki nga nagsag-ob og tubig sa Sambag II, Siyudad sa Sugbo niadtong Lunes sa buntag.

Ang biktima mao si Jessel Abrahan Tarraja, 34, taga Riverside, B. Rodriquez Extension, Sambag II, samtang ang suspek giila nga si Rogelio Antigua Maratas, Jr., 47, iyang silingan.

Nagkalalis ang biktima ug ang suspek hinungdan nga nagsinumbagay apan matud pa napilde si Maratas.

Dihang musag-ob na unta og tubig gikan sa tabay si Tarraja, gipusil kini samtang nagtalikod.

Bisan samdan, gisuwayan sa pag-ilog ni Tarraja ang pusil apan giuwang sila sa mga silingan ug gikulata ang suspek kinsa kadiyot nawagtangan sa panimuot apan dihang nakamata na, dali kining nisibat.

Samtang usa ka biyudo nga nanglawog ra sa iyang mga manok ang gipusil sa iyang silingan sa Kabugohan, Toong, Siyudad sa Sugbo niadtong Lunes sa gabii.

Ang biktima giila nga si Ernesto Paran Jabonita, 57, samtang ang suspek mao si Cristino Papellero Sasotil, 36, nagpuyo sa silingang sitio sa Badiang.

Human sa krimen nikaratil sa pagdagan ang suspek samtang dali nga gidala ang biktima sa tambalanan.

Sa laing bahin wala pa mailhi ang lalaki nga gipusil patay sa Barangay Tejero, Siyudad sa Sugbo niadtong Lunes sa kadlawon.

Ang biktima anaa sa 20 ngadto sa 30-anyos, may gitas-on nga 5’3” ug nagsul-ob og itom nga sweat shirt, maong jeans ug brown nga kawo. (BANAT NEWS)