Eskwelahan sa Sapangdaku klasehan pagbalik

CEBU, Philippines - Sa pagbukas sa klase sunod buwan, katunga sa mga tinun-an sa Sapangdaku Elementary School sa Dakbayan sa Sugbo nga temporaryong gipahiluna sa barangay hall ang ibalik sa karaan nila nga tunghaan.

Upat ka tuig ang nakalabay gipabalhin sa barangay hall ni kanhi mayor Michael Rama ang mga tinun-an nga duol sa sapa human nisaka ang tubig ug niabot sa mga classrooms. Ang maong tunghaan dunay kapin sa 500 ka tinun-an nga gibalhin sa barangay hall diin naghimo og makeshift classroom apan matud pa dili maigo ang tanan.

Subay niini, ang Department of Education-Cebu City Division nihimo og pakisusi sa lugar ug nakita nila nga ang 3-story barangay hall wala gi-design alang sa maong katuyuan.

Gihulagway usab nga delikado ang barangay hall sa mga tinun-an gikan sa Kinder 1 hangtud sa Grade 3 ilabi na kung dunay mga emerhensiya gumikan kay hayan mag-stampede ang mga tinun-an tungod sa kahagip-ot ug ka gamay sa hagdanan.

Gani si Konsehal Joy Augustus Young, sa Local School Board ug assistant deputy mayor education, nanginlabot na man sa sitwasyon ug kung siya ang pabut-on mas buot niini nga pabalhinon sa Barangay Guadalupe ang mga tinun-an.

Apan sigun sa principal nga si Babylin Palban nga ang mga ginikanan dili mosugot kay matud pa kun risgo ang sitwasyon sa mga tinun-an sa barangay hall, mas risgo ang inadlaw-adlaw nga pagbiyahe sa ilang mga anak sakay sa habal-habal.

Nauyonan nga kadtong mga tinun-an sa Kinder 1 hangtud sa Grade 3 nga maoy ibalik sa karaan nga tunghaan kay gawas nga dunay mitigating measure ang DepEd lakip na ang tunghaan, mas duol ra sab ang evacuation center sa tunghaan kung dunay emerhensiya.

Samtang ang mga tinun-an sa Grade 4 ngadto sa Grade 6 maoy magpabilin sa barangay hall sa Sapangdaku.

Hinoon sigun ni Young nga ang siyudad padayon nga nangita og luna aron katukuran og laing tunghaan sa maong barangay. (BANAT NEWS)