Tom uyon sa drug test sa inmates
CEBU, Philippines - Mosuporta si Mayor Tomas Osmeña sa hangyo sa Cebu City Jail nga abagan sila sa ilang lakang nga ipaubos sa drug test ang mga inmates subay sa direktiba sa ilang labaw.
Kahinumduman nga si Jail Warden, Superintendent Arnel Peralta, nagpadala og suwat kang Konsehal Dave Tumulak, deputy mayor for police matters nga naghangyo sa siyudad nga suportahan sila sa ilang plano nga ipaubos sa drug test ang 4,350 ka inmates.
Subay niini, si Osmeña buot sab mahibawo sa sitwasyon sa maong pasilidad ilabi na sa mga inmates.
Apan ang mayor nakapangutana kung unsay mahitabo sa mga magpositibo sa drug test nga anaa naman sila daan sa prisohan.
Tungod kay wala malakip sa pundo karong tuiga ang alang sa maong plano, ang mayor niingon nga posible nga ilakip sa supplemental budget ug mahimo usab nga kuhaon ang pundo gikan sa peace and order funds.
Uyon sab ang mayor nga dili lang ang mga inmates ang ipaubos sa drug test apan lakip na sab ang mga jail officers.
Buot ni Osmeña nga mandatory ang drug test aron dili makabalibad kadtong mga giingong nagsige gihapon og gamit og ilegal nga drugas apan gitugyan na sa mayor sa kadagkuan sa City Jail ang desisyon niini.
Pabor sab si Osmeña nga relibuhan kadtong unom ka jail officers nga gawas nga wala mohimo sa ilang trabaho gidudahan pa gyud nga kakonsabo sa mga inmates hinungdan nga sa niaging Oplan Galugad sa pasilidad daghang kontrabando ang nasakmit. (BANAT NEWS)
- Latest
