Upat positibo sa drug test

CEBU, Philippines - Tulo ka job order employees nga nadestino sa Barangay Pakna-an, Mandaue City ang gipaabot mataktak sa trabaho human sila nagpositibo sa paggamit og ilegal nga drugas sa dihang gipaubos sila sa surprise drug test kagahapon sa buntag.

Matud pa nga 226 ka mga kawani, ang gipaubos niini apan 135 lang kanila ang nitunga sa surprise drug test nga gihimo sa city health department diha sa Pakna-an Barangay gymnasium.

Sumala pa ni Paknaan Barangay Councilor Dulce Jumao-as ang mga empleyado gipatawag alang sa general meeting sa tanang job order employees.

Kadtong mga wala makatambong nga way balidong rason pangayoan og “show cause orders” ug kinahanglang magpa-drug test apan sila maoy pabayron.

Si Mayor Luis Gabriel Quisumbing daan nang mipasidaan nga kadtong positibo sa drugas taktakon dayon sa trabaho.

Sa laing bahin, usa ka garbage loader sa Barangay Sirao, Dakbayan sa Sugbo ang nagpositibo sa kinalit nga drug test nga gipahigayon sa mga sakop sa Cebu City Office for Substance Abuse Prevention (COSAP) kaniadtong Lunes.

Kabahin siya sa kapin sa 100 ka kawani nga mga garbage loaders, tanod ug drayber sa Barangay Adlaon, Binaliw, Taptap ug Sirao nga gipakalitan pag-drug test.

Ang hepe sa COSAP nga si Dr. Alice Utlang mibutyag nga kagahapon laing kapin sa 100 ka kawani sa Barangay Kamputhaw, Agsungot, Pulangbato ug Bacayan ang gi-drug test apan wala pa dayon mahibaw-i ang resulta.

Sukad kaniadtong Enero, kapin na sa 100 ka kawani sa lainlaing barangay ang napositibo ug kadaghanan kanila mga garbage loaders, ug gisundan sa mga tanod. (BANAT NEWS)