Russia mobubo og puhonan sa Sugbo

CEBU, Philippines - Mga opisyal sa Kapitolyo, milarga paingon sa nasud nga Russia niadtong milabay’ng Domingo aron makigkita sa mga opisyal sa Saint Petersburg.

Si Bise Gobernador Agnes Magpale mibutyag nga sila si Bokal Horacio “Raci” Franco, Jude Sybico ug Antonio Miguel Magpale uban kang Provincial Legal Consultant Atty. Magnificus Cañete ang mibiyahe paingon sa Russia.

Matud ni Magpale nga ang maong pagbiyahe sa nahisgutang mga opisyal, sulod kini sa usa ka semana ubos sa imbitasyon sa parliament sa legislative department sa Saint Petersburg.

Niadtong tuig 2009 ang kagamhanan sa probinsiya ug Saint Petersburg adunay friendship ug cooperation agreement ug ang pagpirmahay sa maong kasabutan napahigayon ngadto sa St. Petersburg.

Gibutyag ni Magpale nga ang mga opisyal usab ngadto sa maong lugar nagplano sa pag-anhi sa Sugbo. Apan una sila moanhi, giimbitar nila og una sa pagbisita ngadto sa ilang lugar ang mga opisyal sa Sugbo.

Giingong ang Russia nagpakita og interes sa pagbubo og puhonan nganhi sa Sugbo.

Nunot niini, ang mga opisyal sa probinsiya ug si Presidente Rodrigo Duterte mag-abot ngadto sa Moscow.

Si Duterte mibiyahe paingon sa Russia sa milabay’ng Lunes alang sa iyang upat ka adlaw nga pagbisita sa lugar.

Kahinumduman nga niadtong Septiyembre 2015, si Cebu Governor Hilario Davide, III mibisita ngadto sa Saint Petersburg ug nakigtagbo sa mga opisyal sa maong lugar. Tumong sa maong panagtagbo mao ang pagpalig-on sa mga relasyon tali sa probinsiya ug sa Saint Petersburg. (BANAT NEWS)