Cebu PDRRMO gipasidunggan sa OCD

CEBU, Philippines - Gipasidunggan sa Office of Civil Defense (OCD) ang Provincial Disaster Risk Reduction and Management Office (PDRRMO) isip “Gawad Kalasag Awardee” sa Central Visayas.

Ang Kalamidad at Sakuna Labanan Sariling Galing ang Kaligtasan (Kalasag) Award nagdasig sa mga counterparts ug stakeholders nga ipatuman ang innovative ug gamit sa pagpangandam sa katalagman ug emergency management.

Matud ni Baltazar Tribunalo, pangulo sa PDRRMO, nga ang Probinsiya sa Sugbo ang morepresentar ug makigtigi sa ubang PDRRMO sa nasud alang sa national award karong Hulyo. Si Tribunalo nagkanayon nga makonsiderar kini nga ang Probinsiya sa Sugbo adunay labing maayo nga PDRRMO sa Rehiyon-7. Matud ni Tribunalo nga adunay regular department head, division heads ug staff ang ilang buhatan ug klaro ang report sa disaster preparedness ug klaro ang annual plan maoy hinungdan nga napili sila nga awardee. (Le Phyllis F. Antojado/GMR)

Bahin sa Opon way kuryente sa Domingo

Gipahibawo sa Mactan Electric Company (MECO) nga adunay power service interruption karong Mayo 28 nga molungtad og unom ka oras.

Ang maapektuhan mao ang bahin sa Maximo Patalinghug Avenue hangtud sa eskina Sangi Road hangtud GY dela Serna St.

Dugang maapektuhan ang Opon Public Market, Ompad St. hangtud eskina Mantawi St., Lopez Jaena St. hangtud eskina sa P. Rodriguez St. ug bahin sa Mangubat St; F. Martires St., bahin sa R. de la Serna St. hangtud TC Commercial Bldg. ug S. Osmeña St.

Eskina sa Petron Basak, Mactan Tropics Subdivision, Hoops Dome, Paseo de Amores, Vincent Drive, Weigel Compound, Mactan Benito Ebuen Airbase-Philippine Air Force; St. Anthony Village, Express Inn Hotel, CAAP Tower, BF City Homes, Radaza Plaza ug NOVO.

Ang pagkapawong sa kuryente magsugod alas 6:00 sa buntag hangtud alas 12:00 sa udto atol sa pagpabarug sa unom ka poste sa MECO. (Romeo T. Limpangog/GMR)

4 adlaw nga trabaho pabor sa mga trabahante

Pabor sa mga kawani ang 4-day work matud sa consultant on employment services sa Public Employment Service Office (PESO) sa Kapitolyo nga si Dr. Mathea Baguia.

Gipasabot ni Baguia nga kabahin sa paggamit og kuryente, personnel ug operating expenses, ang kompaniya makadaginot kung mapatuman ang 4-day work.

Ang maong sugyot dili lang pabor sa kompaniya, pabor sab sa mga empleyado.

Matud ni Baguia nga ang empleyado pwedeng makapanikaysikay og laing panginabuhian aron madugangan usab ang ilang kita sa laing mga adlaw.

Uban kanila makahatag na sab og taas nga panahon sa pag-atiman sa ilang pamilya ug sa mga buluhaton sa ilang balay.

Sa maong sugyot nga 4-day work o upat ka adlaw lang ang trabaho sa usa ka semana, giingong dili maalkanse ang kompaniya tungod kay ang empleyado kinahanglan man usab motrabaho sulod sa 48 oras o 12 oras matag adlaw subay sa Labor Code sa nasud.

Ang committee on labor and employment sa Kongreso niaprobar sa House Bill 5068 ni Kongresista Mark Go sa Baguio City tumong nga himoong upat ka adlaw na lang ang trabaho sa usa ka semana apan 12 ka oras matag adlaw.

Hinuon dili kini mandatory sa mga kompaniya kay mahimo ra nga maghimo og kaugalingong work schedule ang matag kompaniya base sa ilang operasyon. (BANAT NEWS)