8-anyos nga nasunugan missing pa

CEBU, Philippines - Hangtud sa pagsuwat niining balita kagahapon sa hapon wala pa gihapon igkita ang gikataho nga nawagtang nga 8-anyos nga bata sa sunog sa Sitio Matumbo, Pusok, Dakbayan sa Lapu-Lapu. Kini bisan sa pagtinabangay sa pagkuykoy sa kapolisan, kabomberuhan ug mga molupyo sa nasunugan diin kapin sa 100 ka panimalay ang naugdaw.

Ang 16-anyos nga igsoon sa bata kinsa usa sa upat nga naangol gumikan sa mga paso nitug-an nga gisusi na ang mga lawak sa eskwelahan sa Pusok sa pamasin nga nitipon kini sa uban nga mga biktima.

Si Senior Police Officer 3 Allan Pantaleon sa Homicide Section sa Lapu-Lapu City Police Office, niingon nga wala pa sila kadawat og taho nga adunay kinabuhing nakalas sa maong sunog nga nahitabo dungan ang panghinaut nga buhi ang bata. Gawas sa barangay ug siyudad, ang Department of Social Welfare and Development-7 ang nanghatag na og hinabang ngadto sa mga biktima sa sunog sa Pusok ingon man sa Labangon, Dakbayan sa Sugbo.

Matud ni Leah Quintana, tigpamaba sa DSWD-7, nga nakahatag na sila of 200 ka pakete nga arroz caldo ready-to-eat (RTE) nga pagkaon sa mga nasunugan sa Labangon tungod kay ang lokal nga kagamhanan aduna pay mahatag sa mga biktima.

Sa Pusok, matud ni Quintana nga wala pa sila nakadawat og hangyo gikan sa lokal nga kagamhanan tungod kay nagsige pa sila og lista sa mga biktima.

Kasagaran nga ihatag sa DSWD, gawas sa pagkaon, mao ang mga non-food items sama sa habol, moskitero, gamit sa kusina ug family clothing kit.

Samtang gibutyag sa pangulo sa Division for the Welfare of the Urban Poor, Genevieve Alcoseba, nga nagpadala na sila og tawo sa Sitio Kamanggahan, Labangon human sa sunog. Nasayran nga 30 ka balay ang gilamoy sa kayo ug sigun pa ni Alcoseba nga 18 sa mga balay naa sa pribadong luna ug ang laing 12 nasulod sa luna nga iya sa kagamhanan sa siyudad.

Susihon sa DWUP ang kahimtang sa luna ilabi na sa pribadong tag-iya kung makabalik pa ba sa pagpuyo ang mga biktima o kaha paliton kini sa gobyerno.

Kadtong mga naa sa luna nga iya sa siyudad ang ipaubos sa re-blocking.

Ang pangulo sa Department of Social Welfare and Services (DSWS), kanhi konsehal Lea Japson, niingon nga nakahatag na og food packs ang siyudad sa mga biktima kinsa temporaryong gipahiluna sa barangay hall. Matud ni Japson nga hayan molanat pa og buwan una mahatag ang P20,000 nga financial assistance sa mga biktima. Romeo T. Limpangog, Mitchelle L. Palaubsanon ug Decemay P. Padilla (BANAT NEWS)