Nagselos nanunggab
CEBU, Philippines - Nalandig sa tambalanan ang usa ka biyudo kinsa gidunggab sa kapuyo sa iyang giingong gi-uyab sa Tabunok Public Market sa Tabunok, Dakbayan sa Talisay niadtong Domingo sa gabii.
Ang biktima mao si Reno Obiso, 56, taga San Miguel, Linao sa maong dakbayan, samtang ang suspek nailhan lang sa pangan nga si Ciano, hingkod, taga Campo 4 sa mao gihapong dakbayan.
Gipasanginlan ni Ciano si Obiso nga kabit sa iyang kapuyo hinungdan sa kalagot sa suspek ug nisulong sa giinoman sa biktima ug kaubanan. (Gabriel C. Bonjoc/GMR)
Gidunggab sa paryente
Nadunggaban sa iya ra sab paryente ang usa ka lalaki samtang sila nagtagay liwas sa piyesta sa Barangay Sungko, Lungsod sa Bantayan niadtong Domingo sa gabii.
Sila si Mariano Desales Desamparado, 62, taga San Isidro, Ormoc City, ug Joan Magtulis Desamparado, 39, taga Sitio Riverside, Sungko, Bantayan, ang nag-inom.
Dihang nangahubog, giingong nagkalalis ang duha hinungdan nga nagkasinumbagay ug kalit nga gidunggab ni Mariano si Joan sa tiyan hinungdan nga nalandig sa tambalanan samtang si Mariano ang natanggong na sa prisohan. (BANAT NEWS)
- Latest