P1M shabu nasakmit

CEBU, Philippines - Gibanabanang P1 milyon nga kantidad sa shabu ang nasakmit sa managlahing buy-bust operation sa kapolisan dinhi sa Sugbo.

Gironda sa mga sakop sa Municipal Drug Enforcement Unit (MDEU) ang giabangang balay sa gidudahang drug pushers nga sila si Franklin Pescador Abanico Jr. alyas Jun-Jun, 27, ug si Federico Sonsona Sobrevilla, alyas Frederick, 52,  sa Sitio Kalambre, Pulpogan, Consolacion.

Si Police Chief Inspector Roderick Gonzales, hepe sa Consolacion niingon nga dugay nang residente si Abanico sa maong lugar apan bag-o lang kini nisud sa pagpamaligya og shabu. Nasakmit gikan sa duha ang pipila ka mga pakete sa gidudahang shabu nga mobalor na og P 224,200. Laing gidakop sa mga sakop sa Mandaue City Police Office ug Consolacion Police Station sa buy-bust operation si Bener Lopez Sangag, 39, sa Bamboo Hills Brgy. Poblacion Occidental, Consolacion.

Matud pa nga unang nadakpan sa checkpoint sa siyudad sa Mandaue ang usa ka Jake dela Victoria nga giingong nakuhaan og usa ka paketeng gidudahang shabu ug mao kini ang nihatag og impormasyon bahin ni Sangag hinungdan sa gihimong joint operation sa kapolisan. Usa ka dako nga pakete ug siyam ka medium nga pakete ang nasakmit gikan ni Sangagsa sa maong pusher nga mokantidad og P300 mil.

Samtang nadakpan usab ang managsuong  sila si Quilbert Bade Calinawan, 36, ug si Serenisa Bade Calinawan, 42, nagpuyo sa Sitio Plastican, Barangay Duljo-Fatima sa siyudad sa Sugbo kay giingong naaktohang namaligya og drugas ug nakuhaan og 34 ka gagmay ug usa ka medium nga paketeng gidudahang shabu. Nasikop usab sa lungsod sa Catmon si Jesufiel Orlanes Estenzo, 40, taga Barangay Macaas ug nakuhaan og usa ka medium pack, ug ka 25 ka gagmay’ng pakete sa gituohang shabu ug usa ka .38 caliber revolver.

Si Sr. Insp. Narciso Abapo nagkanayon nadakpan na nila niadtong Abril sa miaging tuig si Estenzo tungod gihapon sa kaso sa ilegal nga drugas apan nakapiyansa kini. Samtang sa Daanbantayan nasakmitan og upat ka gagmay’ng paketeng shabu si Bobby Abing Aton, 38, taga Mantan-agi, Barangay Bateria sa maong lungsod. Sa Lapu-Lapu City, nadakpan usab sila si Seldon Jarabe Tampus, 24, ug si Justin Casul Barrauela, 22, mga residente sa Barangay Gun-ob. Walo ka mga gagmay nga paketeng gituohang shabu ug cash nga P800 ang nasakmit gikan ni Tampus samtang usa ka gamay nga  pakete ug P100 ang kang Barruela nga mokantidad tanan og P129,328. Camille Pateres, Rowena Capistrano, Romeo Limpangog ug report nila ni Jemuel Man-on ug Shaine Maniego (BANAT NEWS)