Coops may paglaum pa sa tax exemption

CEBU, Philippines – Malaumon pa gihapon ang mga kooperatiba nga dili mapapas sa balaud ang ilang tax exemption.

Kini bisan gipasar na sa House Committee on Ways and Means niadtong Mayo 3 ang “pro-poor tax reform bill” diin wagtangon ang benepisyo sa mga kooperatiba lukop nasud. Matud ni Kongresista Sabiniano Canama sa COOP-NATCCO Partylist nga duna pay laing pag-amendar sa committee report sa plenary.

Nunot niini si Canama nanawagan sa mga kooperatiba nga hangyoon ang mga kongresista sa tagsatagsa ka distrito nga babagan ang pagpahamtang og buhis sa mga kooperatiba nga nalatid sa House Bill 4774. Ang awhag ni Canama giluwatan atol sa 47th Annual General Assembly Meeting ug National Convention sa VICTO National sa Panglao, Bohol niadtong Sabado nga giapilan sa mokabat 800 ka lider sa kooperatiba sa nasud.

Ang House of Representatives gipaabot nga motuki sa balaudnon sa dili pa ang ilang sine die adjournment karong Hunyo 2.

Matud ni Canama nga si Senador Juan Miguel Zubiri nangayo usab sa suporta sa mga kooperatiba nga dili mapasar sa Senado ang balaudnon.

Karong Mayo 24, si Zubiri, chairman sa Senate Committee on Cooperative Development, gikatakda nga mopadangat sa iyang privilege speech aron unhan ang unsang lakang sa Senado kabahin sa balaudnon. “Dako og possibility nga dili mapasar sa Senado,” matud ni Canama. (BANAT NEWS)