Bakuna alang dengue ihatag karong Hunyo

CEBU, Philippines - Ihatag karong buwan sa Hunyo ang 1st Dose sa dengue vaccine sa Central Visayas ngadto sa mga tunghaan.

Gipahibawo ni Department of Health Secretary Paulyn Ubial nga nagpadayon ang ilang mga training, social preparation sa target population lakip na ang mga ginikanan ug magtutudlo.

Sumala pa ni Ubial, karon Hunyo iapod-apod na nila ang unang 1st Dose sa maong bakuna ngadto sa mga tunghaan sa Tunga-tungang Kabisay-an.

Gitug-an sab ni DOH-7 Director Jaime Bernadas nga nakadawat na sila og kamanduan gikan kang Ubial alang sa maong ipahigayon nga pagpamakuna.

Sumala niini nga nahimo na nila ang tanang pagpangandam labot sa maong kalihukan lakip ang mga konsultasyon diin sa pagkakaron gipaabot na lang nila ang guidelines.

Sa talaan sa Regional Epidemiology and Surveillance Unit, adunay usa ka porsiyento nga pagsaka karon ang kaso sa dengue, gikan sa buwan sa Enero ngadto sa Mayo kun ikomparar sa nilabay’ng tuig, apan mas daghan og nakalas karong tuiga.

Nasayran nga 5,686 ka kaso karong tuiga nga adunay 57 ang patay, samtang sa nilabay nga tuig, 5,683 ka kaso ug 44 ang namatay.

Nag-una gihapon sa adunay daghang kaso sa dengue mao ang Cebu City nga adunay 1,314 ka kaso ug 20 patay, gisundan sa Mandaue City, Lapu-Lapu City, Consolacion ug Dumaguete City. (BANAT NEWS)