Banat ( Leaderboard Top ), pagematch: 1, sectionmatch: 1

Mga kontrabando nakuha sa Cebu City Jail

CEBU, Philippines - Mipahigayon og Oplan Galugad ang mga namunuan sa Cebu City Jail diin daghang kontrabando ang nakuha gikan sa mga selda sa maong pasilidad.

 Gipangulohan ni JSupt. Arnel Peralta, warden sa city jail ang maong operasyon kagahapon sa kadlawon nga gitambongan sab ni  Konsehal Dave Tumulak ang Deputy Mayor for Police Matters.

Daghang kubol ang gipangbungkag  aron dili makadugang sa kahuot sa mga selda sa mga priso. Gipangsakmit sab ang mga nagkalain-laing klase sa kontrabando sama sa gadgets, appliances, drug paraphernalia, improvised weapon, Nubain ug uban pa.

Wala’y shabu nga nakuha apan sigon ni Tumulak, gihimo ang maong operasyon aron pagsuta kun unsa ka tinuod ang nadawat nila nga taho nga adunay mga drug pusher nga nagpadayon gihapon sa ilang operasyon sulod ug gawas sa Cebu City Jail.

Nunot niini, gipahibawo sa konsehal nga aduna pay laing greyhound operations nga mahitabo sanglit nagtuo siya nga adunay druga sa sulod sa prisohan.

Gipaabot usab sa opisyal sa city jail nga nagkuwang sila og jail officers ug aron matubag ang problema, mutabang ang siyudad pinaagi sa pagpasar og resolusyon nga mag-awhag sa National Headquarters sa Bureau of Jail Management and Penology nga dungagan og guwardiya ang city jail.

Giingong ang Cebu City Jail anaa sa ikaduhang pwesto sa adunay labing daghang priso nga muabot sa kapin 4 mil ug sagad sa mga nabilanggo dinhi, nalambigit sa ilegal nga drugas ang kaso.

Nakita usab ni Tumulak nga aduna’y problema sa sistema sa maong pasilidad kay diha pa lang sa frisking area, diin moabot sa kapin usa ka libo ang moduaw matag adlaw, tulo lang ka jail officers ang mokapkap sa mga moduaw.

Hinungdan nga nagtuo siya nga kuwang gyud ang tulo ka tawo nga mohimo niini hinungdan nga adunay molusot nga mga kontrabando. Iyang hangyo nga dungagan gyud ang mga jail officers sa maong pasilidad. (BANAT NEWS)

  • Follow Us: