Banat ( Leaderboard Top ), pagematch: 1, sectionmatch: 1

Disiplina, bisekleta ug dili 4-day work ang solusyon

CEBU, Philippines - Disiplina sa mga drayber ug paggamit og bisekleta maoy nakitang solusyon ni Gob. Hilario Davide, III pagsulbad sa problema sa trapiko ug dili ang paghimo na lang nga upat ka adlaw ang trabaho kada semana.

Mao kini ang iyang reaksyon dihang adunay mga sugyot karon didto sa kaulohan nga kun himuong upat ka adlaw na lang ang trabaho sa usa ka semana mamenusan gyud ang problema sa trapiko.

Gawas niini, giingong makapahuway og taas-taas nga adlaw ang mga empleyado.

Apan si Davide nagkanayon nga ang pagsulbad sa kahuot sa trapiko mao nga ang katawhan magbaton og disiplina ug magkat-on na sa paggamit og bisekleta.

Giingong ang paggamit og bisekleta gawas nga exercise sa lawas makatabang pa kini sa pagluag sa trapiko.

Matud niya nga bisan himuong upat ka adlaw ang trabaho apan ang eskwela sulod kini sa lima ka adlaw diin ang mga estudyante ihatud ug kuhaon sa mga ginikanan sakay sa mga pribadong sakyanan.

Si Davide pabor sa carpooling nga maoy mohatud ug kuha sa mga estudyante tungod kay sa usa ka carpool ubay-ubay  man ang makasakay nga estudyante kompara sa ihatud sila tagsa-tagsa sa ilang mga ginikanan nga magtagsa pud og dala og sakyanan.

Ang gobernador misugyot nga mas maayong buhaton mao ang pag-limit sa gidaghanon sa sakyanan sa kadalanan ug kaikog sa mga adunahang nanag-iya og daghang sakyanan ngadto sa uban ug di magtagsa og gamit niini.

Ang Committee on Labor and Employment miaprubar sa House Bill 5068 ni Baguio Representative Mark Go nga mao ang voluntary compressed working days nga himuong upat ka adlaw nalang ang tingtrabaho apan 12 ka oras ang working  hours kada adlaw.

Niining paagiha moabot gihapon og 40 ngadto sa 48 ka oras matag semana ang trabaho sa mga empleyado subay sa gipangayo sa Labor Code sa Pilipinas.

Sa pagkakaron ang empleyado dunay unom ka adlaw nga trabaho sa usa ka semana ug sulod sa walo ka oras ang duty matag adlaw.

Ang 4-day work dili kini mandatory sa mga kompaniya kay mahimo ra nga maghimo og kaugalingong work schedule ang matag kompanya base sa ilang operasyon. (BANAT NEWS)

  • Follow Us: