Cebu City nangandam sa transport strike

CEBU, Philippines - Aron dili maparalisar ang dagan sa trapiko sa dakbayan sa Sugbo ang kagamhanan sa siyudad nangandam sa umaabot nga nationwide transport strike sa Pagkakaisa ng Samahan ng mga Tsuper at Operator(PISTON) ug ubang grupo karong adlaw’ng Lunes.

Matud ni Cebu City Councilor Dave Tumulak, Chairman sa Committee on Public Order and Safety girespetar sa siyudad ang katungod sa mga drayber sa pagpadayag sa ilang sentimiyento apan dili unta nila hasulon ang mga pasahero.

Adunay kinse ka mga buses ang padaganon sa siyudad aron mopasakay sa mga pasahero  nga ma-stranded kay wala’y kasakyan. Adunay mga pulis nga ipakatap sa kadalanan aron pagsiguro sa seguridad sa katawhan.

Samtang ang operations head sa Cebu City Transportation Office (CCTO) Franciso Ouano, miingon andam na sila sa transport strike nga mahitabo.

Mag-deploy usab ang CCTO og mga traffic enforcers sa mga nagkalain-laing lugar, andam na sab ang mga sakyanan nila kun kinahanglanon ug wala’y ipatumang road closure o kaha rerouting atol sa kalihukan.

“So far wala tay closure, wala sad tay re-routing, dili kaayo na sila makamugna og kadaot pero just in case lang gyud ready na gyud atong mga sakyanan ug personnel karong Lunes,” sigon ni Ouano.

Ang strike pagduyog kini sa PISTON-Cebu sa ilang mga kauban sa kaulohan nga supak sa planong modernisasyon sa transportasyon sa Pilipinas ilabi na ang pag-phase out sa mga kagangkagang ug lapas 15 ka tuig nang mga pasaheroan. (BANAT NEWS)