Upat nadakpan kay nagpaangkas og bata
CEBU, Philippines - Atol sa unang adlaw sa implementasyon sa Republic Act 10666 o ang Children’s Safety on Motorcycles Act, upat ang nadakpan sa mga traffic enforcers kay nagpasakay sa motorsiklo og gagmay nga mga bata.
Matud pa ni Joel Maloloy-on, ang operations chief sa Land Transportation Office-7 nga ang lima ka motorcycle drivers nga nadakpan nagkarga gyud og mga bata. Gisakmit ilang lisensya ug giisyuhan sila og Temporary Operators Permit.
“Kung dili nila malukat ilang license within 72 hours, ini og lapse sa 15 days, masuspenso ang ilang license for 30 days from the time of apprehension,”esplikar pa ni Maloloy-on.
Ang madakpan pamultahon og P3,000 sa first offense, P5,000 sa second offense ug P10,000 sa third offense ug usa ka bulang suspension sa driver’s license. Ang molapas na sa ikaupat nga kalapasan kanselahon na ang driver’s license.
Sa Mandaue City, hagbay ra kini nga gidili sa ilang ordinansa sumala pa ni Glenn Antigua, ang operations chief sa Traffic Enforcement Agency of Mandaue (TEAM) nga nahinabi sa Banat News.
Matud pa ni Antigua nga gidili sa Mandaue City ang pagpaangkas sa motor sa mga 10-anyos nga bata paubos kay kanang edara maglisod pagpatong sa tiil ug dili usab makagakus sa drayber.
Apan ang ordinansa sa Mandaue mas gamay og multa nga P1,000 sa unang kalapasan, P1,500 sa ikaduha ug pag-impound sa motor sa ikatulo nga higayon. (BANAT NEWS)
- Latest
