Doktor sikop sa PDEA

CEBU, Philippines - Mokabat sa P1.7 milyones ang balor sa shabu nga nasakmit gikan sa 11 ka tawo apil ang usa ka doktor sa managlahing buy-bust operation sa mga sakop sa Philippine Drug Enforcement Agency sa Siyudad sa Sugbo.

Sa unang operasyon nadakpan sa Barangay Sta. Cruz sila si Edwardo Hermogino, 35; Aaron Lao,39; Jerome Señoron, 29; Rommel Nabaluna, 46; Freola Erac,43; ug ang doktor nga si John Paul Camello, 37, ug nakuhaan og 28 ka pakete sa shabu nga balor og P357mil.

Matud ni PDEA-7 Director Yogi Filemon Ruiz nga si Camello nakit-an sa akto nga naggamit og ilegal nga drugas apan nihimakak ang doktor. Sigun pa ni Camello nga niadto siya sa lugar aron bisitahon ang iyang pasyente nga usa sa mga nadakpan ug ang inahan niini. Samtang nadakpan sab ang usa ka high value target nga si Nelson Orillo, 33, sa Sta. Maria Village, Talamban niadtong Lunes sa gabii ug nakuhaan og 12 ka pakete sa shabu nga balor og P600 mil.

Sa laing bahin nadakpan sab sa Alaska, Mambaling sila si Jade Polbos, 28; Romerico Palapar, 21; Ramonito Rabasol, 42, ug Jayson Abellana,19, niadtong Martes sa kadlawon, diin sila nakuhaan og 12 ka pakete sa shabu nga balor og P744 mil. Duha sab ka pushers ang nasikop kinsa nakuhaan og ilegal nga drugas nga kantidad og P42 mil sa buy-bust operation sa City Intelligence Branch ug Drug Enforcement Unit sa Riva Ridge Compound, Barangay Tisa niadtong Lunes sa gabii. Ang mga suspek giila nga sila si Mirasol Abellana Gabutero, 32, ug Joselito Romanos Cabigas, 33, molupyo sa maong dapit.

Minor gigamit

Sa Dakbayan sa Lapu-Lapu, sikop ang suspetsadong drug pusher samtang usa ka minor de edad nga gigamit niini nga maoy kontak sa poseur buyer ang na-rescue alas 9 pasado sa gabii niadtong Lunes sa Barangay Pajo.

Ang nasikop naila nga si Guia Sumagang alyas Edjun, 50, taga Purok Sambag, Buagsong, Cordova samtang ang na-rescue usa ka 16-anyos nga dalagita kinsa gitugyan na sa City Social Welfare Office.

Nakuha gikan kang Sumagang ang shabu nga balor sa dul-an sa P600 mil.

Samtang sa Sitio Kagudoy, Basak sa maong dakbayan, nadakpan ang laing unom ka gikatahapang pusher og shabu nga naglakip sa upat ka babaye.

Giila ang mga nadakpan nga mga priority targets sa kapolisan nga sila si Roselyn Wahing Daño, 32, taga Basak; Joel Elisterio Candilada, 30, taga Pajo; Jerwin Casas Abanid, 30; Glenda Nuneza Daño, 27, ug Maria Estardo Candilada, 28, pulos taga Punta Engaño. Nasakmit gikan sa mga suspek ang usa ka dako ug 11 ka medium-size nga mga pakete sa shabu nga kantidad og P1.8 milyones.

Tanod pusher

Sa laing bahin usa ka barangay tanod ang nasikop sa buy-bust operation niadtong Lunes sa gabii sa Sitio Saksak, Bahay, Sibonga. Ang suspek giila nga si Ceferino Calderon Fernandez, 40, tanod ug habal-habal driver, nga nagpuyo sa Barangay Tubod sa maong lungsod, kinsa nakuhaan og duha ka pakete sa gidudahang shabu.

Matud sa deputy chief sa Sibonga Police Station, SPO4 Darline Banogon, nga small time nga mamaligyaay og shabu si Fernandez sa ilang lugar ug usahay maabot kini og pamaligya sa lain pang barangay ilabi na kung naay piyesta. Dugang pa niya nga mismo ang kapitan sa ilang barangay ug mga kaubang tanod ang nibadlong kaniya apan wala kini naminaw. Gi-tukhang na kini apan wala gihapon ni-surrender,.

“Ako silang giingnan nga kung naa man gani sila anang bisyoha moundang na gyud sila,” matud sa kapitan nga si Magdalena Maravillas kinsa nidugang nga aktibo kaayo isip tanod si Fernandez gawas lang kung Oplan Tukhang ang hisgutan.

Magtiayon

Sa Dakbayan sa Talisay, managtiayon nga tigpayuhot og ilegal nga drugas ang nasikop sa kapolisan sa may Sitio Rattan, Tangke kagahapon sa buntag. Ang mga dinakpan mao sila si Rosane Racaza alyas Aming, 29, ug si Ricardo Cabrera Jr. alyas JR, 33-anyos. Si SPO1 Jeffrey Diola sa Talisay City Police Station nagkanayon nga si Racaza mao gyud ang ilang target sa buy-bust operation human nitumaw ang pangan sa ilang listahan nga mga tigpayuhot og ilegal nga drugas. Ilang nasikop si Racaza ug naapil si Cabrera sa iyang pagtabang sa  ilegal nga negosyo ug nakuhaan sila og ginadiling drugas nga balor og P59 mil.

Sa laing bahin tulo ka naghupot og ginadiling drugas ang nasikop sa mga awtoridad sa merkado sa Barangay Lagtang niadtong Lunes sa alas 7:45 sa gabii.

Ang mga nasikop mao sila si Khlark Dhave Villaver, 18; Edmund Repunte, 18, ug Andel Cabo, 42-anyos.

Ang kapolisan nihimo og follow-up sa tulis diin usa ka Thelma Daruca, 52, taga Sitio Ilang-Ilang, San Isidro ang nabiktima.

Nakit-an ang tulo nga kadudahan ang lihok hangtud nga girekisa ug nakuhaan si Villaver og usa ka medium-size sa shabu ingon man si Repunte samtang pito ka gagmay nga pakete ang nakuha gikan kang Cabo nga ang tanan balor og P132,160.

Paglabay sa usa ka oras, usa ka Hermie Dales, 38, ang niabot sa buhatan sa kapolisan ug nisumbong nga siya gikawatan sa Barangay Tabunok. Tungod niini ang operatiba ang nilahos sa Sitio Mananga 1 aron susihon ang mga inilang kawatan sa lugar ug sa pagsulod sa mga otoridad ilang nakita ang tulo ka lalaki nga nagtinunolay og ginadiling drugas hinungdan nga gisita. Ang tulo nailhan nga sila si Jonathan Termulo, 22; Dante Racaza, 41, ug Dennis Panilag, 24-anyos. Apan ang mga suspek ang nikaratil og dagan apan naabtan ang tulo sa mga operatiba ug nakuhaan og ginadiling drugas. Lakip nga narekober sa mga awtoridad mao ang pitaka ni Dales nga gikawat sa mga suspek.

Samtang usa sikop sa buy-bust operation sa Lungsod sa Daanbantayan niadtong Lunes sa kadlawon diin nasikop ang suspek nga si Ramil Alegre Pepito, 45, taga Maya, human kini nakuhaan og lima ka pakete sa shabu nga balor og P1,200. Raziel A. Sumayang, Rhena E. Pizarra, Raziel A. Sumayang ug Hazel A. Secop, Rowena D. Capistrano, Romeo T. Limpangog, Camille L. Pateres ug Gabriel C. Bonjoc (BANAT NEWS)